Futzal üzrə Azərbaycan çempionatının Birinci Liqasında çıxış edən "Qrafika” komandası fəaliyyətini dayandırıb. Sportnet.az-ın məlumatına görə, bu barədə klub rəhbərliyi Azərbaycan Futzal Federasiyasına müraciət ünvanlayıb.
Bunu nəzərə alan federasiya rəhbərliyi bir müddət əvvəl Slovakiyada keçirilən seçmə mərhələdə iştirak etmiş 17 yaşadək futzalçılardan ibarət Azərbaycan milli komandasını çempionata dəvət edib. İki ildən sonra bu komandalar arasında Avropa çempionatının keçiriləcəyini nəzərə alan qurum həmin turnirdə iştirak edəcək milli komandanın formalaşdırılması üçün işlərə start verib. İlkin variantda həftədə 2 dəfə məşq keçəcək yeniyetmələr güclərini Birinci Liqada da sınayacaq. Komandaya yenə Fuad Rzayev rəhbərlik edəcək. Baş məşqçi mütəmadi olaraq gənc futzalçılar arasında seçim edəcək.
Onu da qeyd edək ki, "Qrafika"nın cari mövsümdəki nəticələri U-17-nin hesabına yazılacaq.
