Qurban Qurbanov ilin məşqçisi seçilib.
Sportnet.az xəbər verir ki, "Qarabağ”ın baş məşqçisi Komanda.az saytının apardığı sorğuda birinci olub.
Səsvermədə 74 mətbuat orqanından 79 jurnalist iştirak edib. 77 səs toplayan Qurban Qurbanov 8-ci dəfə ilin ən yaxşı məşqçisi seçilib. 45 yaşlı mütəxəssis demək olar ki, yekdilliklə bu mükafata layiq görülüb. Sorğuda iştirak edənlərdən cəmi iki nəfər "Zirə”nin baş məşqçisi Ayxan Abbasovu fərqləndirib.
Qurban Qurbanov 2017-ci ildə "Qarabağ”a ardıcıl 4-cü dəfə Azərbaycan çempionluğunu, 3-cü dəfə Azərbaycan kubokunu qazandırıb. "Qarabağ” Azərbaycan futbolunun tarixində ilk dəfə olaraq Çempionlar Liqasının qrup mərhələsinə də vəsiqə əldə edib. "Köhlən atlar” qrup mərhələsində Madrid "Atletiko”su ilə qarşılaşmalarda iki xal qazanıb.
Qurban Qurbanova ilin məşqçisi mükafatı sabah təqdim olunacaq. Tədbir "Fairmont otel"in Səttar Bəhlulzadə zalında ("Üç alov qülləsi”) keçiriləcək və saat 13.00-da başlayacaq.
