Çempionlar Liqasında həftənin ən yaxşı futbolçusu müəyyənləşib.
Sportnet.az UEFA-nın rəsmi saytına istinadən xəbər verir ki, VI turun oyunçusu adına "Real Madrid”in hücumçusu Kriştianu Ronaldu layiq görülüb.
İspaniya təmsilçisinin Almaniyanın "Borussiya” (Dortmund) komandasını evdə 3:2 hesabı ilə məğlub etdiyi qarşılaşmada bir qol vuran 32 yaşlı portuqaliyalı forvard səslərin 41 faizini qazanıb. İkinci yeri İngiltərənin "Liverpul” komandasının futbolçusu Filippe Koutinyo tutub. Braziliyalı yarımmüdafiəçi səslərin 38 faizini qazanıb.
Almaniya çempionu "Bavariya”nın yarımmüdafiəçisi Korentin Tolisso isə 8 faiz səslə üçüncü olub.
Qeyd edək ki, Ronaldu dekabrın 7-də Fransanın "France Football" jurnalının 2017-ci ilin yekununa əsasən, "Qızıl top" mükafatına layiq görülüb.
