"Neftçi" klubu Kiril Petrovun Türkiyə I Liqasında çıxış edən "Giresunspor"a keçəcəyinə dair iddialara münasibət bildirib. Klubun meneceri Eldəniz Yusifov Sportnet.az-a açıqlamasında "Fanatik" nəşrinin yazdıqlarının həqiqətə uyğun olmadığını bildirib.
Onun sözlərinə görə, ukraynalı müdafiəçinin flaqmanla müqaviləsi var. Yusifov anlaşması qüvvədə olan futbolçunu heç bir komandaya verməyəcəkləri vurğulayıb: "Petrov təklif aldıqda, ilk növbədə, bizi məlumatlandırmalıdır. Boliviya "Bluminq"inə keçən Uqo Barqasdan fərqli olaraq, o, bizə bu barədə heç nə deməyib".
Qeyd edək ki, "Giresunspor" hazırda Türkiyə I Liqasında 17 oyundan 30 xalla 4-cü pillədə qərarlaşıb. Bu komandada daha bir ukraynalı Dmitri Korkişko çıxış edir.
