Bu həftə "Neftçi" ilə keçirəcəyi oyunlar ərəfəsində "Qəbələ"nin zədəli futbolçularından Baqali Dabo sıraya dönüb.
Sportnet.az-ın məlumatına görə, aprelin 8-də səfərdə "Zirə" ilə Topaz Premyer Liqasının XXII tur matçında xəsarət almış fransalı hücumçu artıq bərpa olunub. 30 yaşlı forvard aprelin 18-də Azərbaycan Kubokunun yarımfinal mərhələsinin cavab görüşündə "Neftçi"yə qarşı oynaya biləcək.
Əvəzində müdafiəçi Vitali Vernidub yenə meydana çıxa bilməyəcək. Qapıçı Dmitri Bezotosnının durumuna isə oyun ərəfəsində aydınlıq gələcək.
Qeyd edək ki, ilk yarımfinal görüşündə "Qəbələ" evdə 1:2 hesabı ilə uduzub. "Qırmızı-qaralar" aprelin 18-də "Neftçi" ilə cavab oyununa, aprelin 22-də isə Premyer Liqanın XXIV tur matçına çıxacaqlar. Hər iki qarşılaşma "Bakcell Arena"da keçiriləcək. Baqali Dabo bu mövsüm çempionatda vurduğu 12 qolla ən yaxşı bombardir sayılır.
