Futzal üzrə Azərbaycan çempionluğunu təmin etmiş "Araz" Yüksək Liqanın XXV turunda 2018-ci ildə ilk, cari mövsümdə isə ikinci dəfə meydanı qələbəsiz tərk edib.
Federasiyanın mətbuat xidmətindən Sportnet.az-a verilən məlumata görə, Naxçıvan komandası "İtaldizain Futsal”la oyunda hesabı lider açsa da, sonradan məğlub duruma düşüb.
Joze Alesio da Silvanın baş məşqçi olduğu kollektivin gücü yalnız bərabərlik qolunu vurmağa yetib - 2:2.
"Araz” cari çempionatda ilk xal itkisi ilə I dövrədə üzləşib. Ötən il noyabrın 8-də Bakı idman Sarayında VI tur çərçivəsində "Neftçi” ilə keçirilmiş oyunda da 2:2 hesabı qeydə alınıb. Sonrakı 15 oyunun hamısında qalib gələn naxçıvanlıların uğurlu seriyası 16-da dayanıb.
