"Salahı mən satmamışam. Əksinə, onunla müqaviləni mən bağlamışdım".
Sportnet.az-ın məlumatına görə, bunu İngiltərə "Mançester Yunayted"inin baş məşqçisi Joze Mourinyo "Çelsi"yə rəhbərlik etdiyi vaxt Məhəmməd Salahdan imtina etməsinə dair xəbərlərə münasibət bildirərkən deyib. Portuqaliyalı mütəxəssis misirli hücumçunun İtaliya "Roma"sına gedişində rolunun olmadığını iddia edib: "Salah "Çelsi"yə gələndə çox gənc idi. O, lazımi fiziki və psixoloji hazırlığa malik deyildi. Sosial və mədəni çətinliklər yaşayırdı. Onun üçün hər şey çox çətin idi. Salahı satmağa mən qərar verməmişəm".
Qeyd edək ki, hazırda "Liverpul" forması geyinən Məhəmməd Salah "Çelsi"də 2014-cü ilin yanvarından 2015-ci ilin fevralınadək çıxış edib. O, 13 oyuna 2 qol vurub.
