İngiltərənin "Mançester Siti" klubunun qapıçısı Ariyanet Muriç Kosovo yığması üçün milliləşdirilib.
Sportnet.az-ın məlumatına görə, bu, Kosovonun UEFA Millətlər Liqasında Azərbaycanla keçirəcəyi ilk tur oyunu ərəfəsində baş verib. 1,98 metr boya malik qolkiper "Mançester Siti"nin U-23 komandasında çıxış etməklə yanaşı, Premyer Liqa üçün də sifariş olunub. İsveçrədə doğulmuş Muriç Monteneqro əsillidir. Daha əvvəl Monteneqronun U-21 yığmasına cəlb olunmuş gənc oyunçu atasının mənsub olduğu Kosovonu təmsil etməyə razılaşıb.
Kosovo Futbol Federasiyasının prezidenti Agim Ademi bir neçə aylıq danışıqlardan sonra perspektivli qapıçı ilə Millətlər Liqası ərəfəsində razılığa gəlmələrindən məmnunluq ifadə edib. O, Avropada və Kosovo Super Liqasında çıxış edən futbolçuları gələcəkdə də yığmaya cəlb edəcəklərini açıqlayıb.
Qeyd edək ki, D Divizionunda 3-cü qrupda yer alan Azərbaycan və Kosovo yığmaları sentyabrın 7-də I tur çərçivəsində Bakı Olimpiya Stadionunda üz-üzə gələcəklər. Oyun saat 20:00-da başlanacaq ("Report").
