Topaz Premyer Liqasında XIV tura yekun vurulub.
Sportnet.az xəbər verir ki, turun son oyununda lider "Neftçi" "Bakcell Arena"da "Sumqayıt" komandasını qəbul edib.
Rəvan Həmzəzadənin idarə etdiyi görüş 0:0 hesablı heç-heçə ilə başa çatıb.
Oyuna qonaq komanda hücumlarla başlayıb. İlk hissənin ortalarından "Neftçi" nəzarəti ələ alıb. Flaqman bir neçə təhlükəli hücum yaratsa da, hesabı açması mümkün olmayıb. İlk hissə 0:0 hesabı ilə bitib.
İkinci hissəni hücumda keçirən "Neftçi" yenə bir neçə qol şansı yaratsa da, bundan istifadə edə bilməyib və görüş elə başladığı kimi 0:0 hesabı ilə başa çatıb.
Bu nəticədən sonra "Neftçi" 33 xalla liderdir, 15 xal toplayan Sumqayıt isə 6-cı yerdə qərarlaşıb.
----------
Topaz Premyer Liqasında XIV turun daha bir oyunu keçirilib.
Sportnet.az xəbər verir ki, həftənin üçüncü matçında "Səbail" "Qəbələ"ni qəbul edib. "Bayıl Arena"da baş tutan görüşdə hesab açılmayıb.
Bu heç-heçədən sonra xalını 21-ə çatırdan "Səbail" 3-cü pillədə qalıb. "Qəbələ" isə 17 xalla "Sabah"la 4-5-ci yerləri bölüşür.
Qeyd edək ki, turun ilk iki oyununda qonaqlar qələbə qazanıb. "Keşlə" "Sabah"ı 2:1, "Qarabağ" isə "Zirə"ni 6:0 hesabı ilə məğlub edib. İlin son turuna saat 19:30-da start götürən "Neftçi" - "Sumqayıt" qarşılaşması ilə yekun vurulacaq.
-----
Futbol üzrə Azərbaycan Premyer Liqasının XIV turunda daha bir qarşılaşma keçirilib.
Sportnet.az xəbər verir ki, "Dalğa Arena”da baş tutan görüşdə "Zirə” "Qarbağ”la üz-üzə gəlib.
Qarşılaşma Ağdam təmsilçisinin böyük hesablı qələbəsi ilə yekunlaşıb - 6:0.
Dani Kintana 29 , 34 və 56-cı dəqiqələrdən fərqlənməklə het-trik edib. Komandanın digər qollarını 42-ci dəqiqədə Mahir Mədətov və 82-ci dəqiqədə Miçel Madeyra vurub. Adrian Skarlatake isə 90+1-ci dəqiqədə avtoqol müəllifi olub.
Bu nəticədən sonra "Zirə” 10 xalla sonuncu – 8-ci pillədə qərarlaşıb. "Qarabağ” isə 30 xalla ikinci yerdədir.
Qeyd edək ki, günün ilk oyununda "Keşlə” "Sabah”ı 2:1 hesabı ilə məğlub edib. Hazırda "Səbail" - "Qəbələ" matçı davam edir. Tura saat 19:30-da başlanacaq "Neftçi" - "Sumqayıt" qarşılaşması ilə yekun vurulacaq.
-------------------------------------
Topaz Premyer Liqasında XIV tura start verilib.
Sportnet.az-ın məlumatına görə, II dövrənin son turunun ilk oyununda "Sabah" komandası "Əlincə Arena"da "Keşlə"ni qəbul edib. Keçmiş FIFA referisi Orxan Məmmədovun idarə etdiyi görüş qonaqların 2:1 hesablı qələbəsi ilə yekunlaşıb. İlk qolu 34-cü dəqiqədə Sərtan Taşqın vurub. 65-ci dəqiqədə Denis Silva fərqi artırıb. Meydan sahibləri 80-ci dəqiqədə Elşən Abdullayevin qolu ilə fərqi azaldıblar. Beləliklə, "Sabah" ardıcıl 5-ci matçını qələbəsiz başa vurub. Elşad Əhmədovun baş məşqçi olduğu kollektiv hazırda 14 oyundan 17 xalla 4-cü pillədə qərarlaşıb. Xallarını 12-yə çatdıran "Keşlə" isə yenidən 7-ci pilləyə yüksəlib.
Bu matçda "Sabah"ın ən yaxşı bombardiri Marko Deviç zədə üzündən forma geyinməyib. O, "Keşlə" ilə oyundan öncə məşqlərin birində xəsarət alıb.
Qeyd edək ki, hazırda "Zirə" - "Qarabağ" və "Səbail" - "Qəbələ" matçları keçirilir. Tura saat 19:30-da başlanacaq "Neftçi" - "Sumqayıt" matçı ilə yekun vurulacaq.
------------------------
Bu gün Topaz Premyer Liqasında XIV turun oyunları keçiriləcək.
Sportnet.az-ın məlumatına görə, II dövrənin son tur qarşılaşmalarının hamısı eyni günə təyin olunub. Əvvəlcə debütant "Sabah" "Keşlə"ni qəbul edəcək. "Əlincə Arena"da təşkil olunacaq görüş keçmiş FIFA referisi Orxan Məmmədova həvalə olunub. Hazırda "Sabah" 17 xalla 4-cü, "Keşlə" 9 xalla sonuncu pillədə qərarlaşıb. Elşad Əhmədovun baş məşqçi olduğu komanda son 4 turda cəmi 1 xal qazana bilib. Onun rəqib həmkarı Tərlan Əhmədovun rəhbərlik etdiyi kollektiv isə son 2 turda uduzub. İlk dövrədə bu komandalar arasında keçirilmiş görüşdə "Sabah” səfərdə minimal hesabla qalib gəlib - 1:0. İndi isə debütant ilk dəfə rəqibini qəbul edəcək.
Digər görüş "Dalğa Arena"da "Zirə" və "Qarabağ" arasında təşkil olunacaq. Matçı FIFA referisi Əliyar Ağayev idarə edəcək. Samir Abasovun baş məşqçi olduğu komanda ötən tur səfərdə "Qəbələ" ilə qolsuz heç-heçə edərək, sonuncu pillədən qurtulub. Hazırda qəsəbə təmsilçisi 10 xalla 7-ci pillədə qərarlaşıb. Ağdam klubu isə son turlar qeyri-sabit çıxışına ötən tur "Keşlə"ni 5:1 hesabı ilə darmadağın etməklə son qoyub. Qurban Qurbanovun baş məşqçi olduğu kollektiv hazırda 27 xalla 2-ci pillədə yer alıb.
"Zirə" və "Qarabağ" indiyədək 13 dəfə üz-üzə gəliblər. Bunların heç birində "qartallar" qələbə qazana bilməyib. "Köhlən atlar" isə 10 görüşdən qalib, 3-dən isə heç-heçə ilə ayrılıblar. Ağdamlılar son 4 qarşılaşmanı 3 xalla bitiriblər. İlk dövrədə bu komanda məhsuldar qələbəyə imza atıb - 3:2.
Daha bir matçda "Səbail" "Qəbələ"ni sınağa çəkəcək. Aftandil Hacıyevin baş məşqçi olduğu kollektiv 20 xalla 3-cü pillədə qərarlaşsa da, son 2 oyununda məğlubiyyətlə üzləşib. İkinci dövrədə nəticələrini nisbətən yaxınlaşdıran "Qəbələ" isə 16 xalla 5-cidir. Sənan Qurbanovun rəhbərlik etdiyi komanda qələbə qazanacağı təqdirdə, 4-cü pilləyə yüksələ bilər. "Bayıl Arena"da keçiriləcək görüşü İnqilab Məmmədov idarə edəcək.
Şəxsi oyunlara gəlincə, tərəflər 5 dəfə üz-üzə gəliblər. Bunların 1-də "Səbail", 3-də "Qəbələ" qalib gəlibsə, daha 1 matç heç-heçə ilə yekunlaşıb. Topların nisbətində də əyalət təmsilçisi öndədir - 11:5. "Qəbələ” bütün matçlarda qol sevinci yaşayıb. Əvvəlki 5 oyunun hərəsində ən azı 2 qol qeydə alınıb. İlk dövrədəki görüşdə isə "qırmızı-qaralar" meydanı 3 cavabsız qolla tərk ediblər.
Nəhayət, turun son oyununda lider "Neftçi" "Sumqayıt"la qarşılaşacaq. "Bakcell Arena"da təşkil olunacaq görüşü Rəvan Həmzəzadə idarə edəcək. Flaqman 13 turdan sonra 32 xalla liderdir və ən yaxın izləyicisini 5 xal geridə qoyur. Ötən tur doğma meydana qayıdışını "Səbail" üzərində 1:0 hesablı qələbə ilə qeyd edən "gənclik şəhəri" təmsilçisi isə 14 xalla 6-cıdır. Ayxan Abbasovun baş məşqçi olduğu kollektiv qələbə qazansa, hətta 4-cü pilləyə yüksələ bilər. İlk dövrədə "Sumqayıt" 0:2 hesabı ilə uduzub.
"Neftçi" və "Sumqayıt" indiyədək 25 dəfə görüşüb. Bunların 13-də paytaxt, 9-da "gənclik şəhəri" təmsilçisi qalib gəlibsə, 3 matçda heç-heçə qeydə alınıb. Topların nisbətində də "ağ-qaralar" öndədir - 41:30.
"Neftçi” son 9 ev oyununda qol sevinci yaşayıb. Son 4 qarşılaşmada qalib komanda 2 qol vurub.
Topaz Premyer Liqası, XIV tur
9 dekabr (bazar)
16:00. "Sabah” – "Keşlə” - 1:2
Qollar: Elşən Abdullayev, 80 - Sərtan Taşqın, 34. Denis Silva, 65
Hakimlər: Orxan Məmmədov, Knyaz Əmiraslanov, Elşad Abdullayev, Alik Yunusov
Hakim-inspektor: Vüsal Əliyev
AFFA nümayəndəsi: Namiq Məstanov
"Əlincə Arena”
17:00. "Zirə” – "Qarabağ” - 0:6
Qol: Dani Kintana, 29, 34, 56. Mahir Mədətov, 42. Miçel Madeyra, 82. Adrian Skarlatake, 90+1 (öz qapısına)
qeyri-dəqiq penalti: Araz Abdullayev, 89
Hakimlər: Əliyar Ağayev, Rza Məmmədov, Akif Əmirəli, Nail Nağıyev
Hakim-inspektor: Rövşən Əhmədov
AFFA nümayəndəsi: Eldar Qasımov
"Dalğa Arena”
17:30. "Səbail” – "Qəbələ” 0:0
Qırmızı vərəqə: Rauf Əliyev ("Qəbələ", ikinci sarı)
Hakimlər: İnqilab Məmmədov, Namiq Hüseynov, Rahil Ramazanov, Səbuhi Bayramov
Hakim-inspektor: Kərim Ağayev
AFFA nümayəndəsi: Eldəniz Musayev
"Bayıl Arena”
19:30. "Neftçi” – "Sumqayıt” - 0:0
Hakimlər: Rəvan Həmzəzadə, Yaşar Abbasov, Cavanşir Yusifov, Ziya Nəsirov
Hakim-inspektor: Şahin Cəfərov
AFFA nümayəndəsi: Əsgər Əmirəliyev
"Bakcell Arena”
Qeyd edək ki, turun "Səbail" - "Qəbələ" və "Neftçi" - "Sumqayıt" görüşləri "CBC Sport" kanalı vasitəsi ilə canlı yayımlanacaq
