"Qəbələ" klubunun futbolçusu Bəhlul Mustafazadənin Sportnet.az-a müsahibəsi
- Azərbaycan Premyer Liqasının XXV turunda "Zirə" üzərində 2:1 hesablı qələbə qazandınız. Bu oyunu necə dəyərləndirərdiniz?
- Çətin oyunun yekununda çox vacib qələbə qazandıq. Bu, "Qarabağ"la keçirəcəyimiz Azərbaycan Kubokunun yarımfinal və "Səbail"ə qarşı Premyer Liqanın XXVI tur oyunlarından öncə komandamız üçün əla motivasiya oldu. Bunun davamını gətirməyə çalışacağıq.
- Daha əvvəl "Keşlə"ni də səfərdə eyni hesabla yenmişdiniz...
- Son oyunlarda komandamızın oyununda irəliləyiş var. Bunu nəticələrə baxanda da görə bilərik. Amma daha yaxşı ola bilərik və bunun üçün çalışırıq.
- İki tur öncə isə "Qarabağ"a Premyer Liqa matçında uduzdunuz. Bəs indi kubok qarşılaşmalarında bu rəqibi nəyin hesabına keçmək olar?
- Əlbəttə, "Qarabağ"ı keçmək mümkündür. Bu, futboldur. Üstəlik, kubok iki oyundan ibarətdir. Ötən mövsüm "Sumqayıt"da çıxış etdiyim vaxt bunu bacarmışdıq. Niyə də olmasın və nəyə görə də bunu edə bilməyək?! Məncə, "Qəbələ" bunu bacaracaq gücdədir və etməyə də çalışacaq.
- "Sumqayıt"da çıxış etdiyin vaxt "Qarabağ"ı nəyin sayəsində 1/4 final mərhələsində üstələyə bilmişdiniz?
- Əlbəttə, bir nömrəli məsələ əzmkarlıq, çalışqanlıqdır. Bu keyfiyyətləri ortaya qoysaq, bacara bilərik.
- Klubda baş verən dəyişikliklər komandaya necə təsir edə bilər?
- Komandamızda hər şey mövsüm başladığı kimi davam edir. Dəyişikliyin bizə heç bir təsiri yoxdur. Yenə eyni qaydada çalışırıq. Mövsümün sonunda necə olacağı bilinmir. Amma hazırda bizi yalnız bu mövsüm maraqlandırır. Komanda olaraq, hədəflərimiz var və buna nail olmağa çalışacağıq. Hələlik bizi gələn mövsüm düşündürmür.
- Adətən, mövsümün sonlarına doğru müqaviləsi bitmək üzrə olan futbolçularla danışıqlara başlanılır...
- Xeyr, bizdə belə bir söhbət olmayıb. Aprelin 23-də kubok oyunumuz var. Yalnız bu haqda danışıq gedir.
