"Qarabağ" komandası UEFA Çempionlar Liqasında II təsnifat mərhələsinin ilk oyununu keçirib.
Sportnet.az-ın məlumatına görə, rəqib İrlandiya çempionu "Dandolk" olub. Eyniadlı şəhərin “Oriel Park” stadionunda təşkil olunmuş qarşılaşmada qalib müəyyənləşməyib - 1:1.
Hər iki qol künc zərbəsindən sonra vurulub. 4-cü dəqiqədə Mahir Emreli, 78-ci dəqiqədə isə Patrik Hoban fərqlənib.
Matçın böyük hissəsi "Qarabağ"ın üstünlüyü şəraitində keçsə də, əlverişli imkanlardan fərqlənmək mümkün olmayıb. İkinci hissənin əvvəllərində isə Ağdam təmsilçisi itki ilə üzləşib. Müdafiəçi Maksim Medvedev zədələnərək, yerini komanda yoldaşı Abbas Hüseynova verib. Bu, baş məşqçi Qurban Qurbanovun ilk əvəzləməsi olub. Növbəti əvəzetmə isə 87-ci dəqiqədə gerçəkləşib - Xayme Romeronu Araz Abdullayev əvəzləyib.
Bu komandalar arasında cavab görüşü iyulun 31-də "Dalğa Arena"da keçiriləcək.
"Qarabağ" I təsnifat mərhələsində "Partizani" ilə Albaniyada qolsuz heç-heçə etmiş, Bakıdakı cavab görüşündə isə qələbə qazanmağı bacarmışdı - 2:0. "Dandolk" isə Latviya "Riqa"sını penaltilər seriyasında üstələməyi bacarmışdı.
----------------------
Bu gün “Qarabağ” UEFA Çempionlar Liqasında növbəti oyununu keçirəcək.
Sportnet.az-ın məlumatına görə, Ağdam təmsilçisi İrlandiyada “Dandolk” komandası ilə II təsnifat mərhələsinin ilk görüşündə üz-üzə gələcək. “Oriel Park” stadionunda baş tutacaq görüş Bakı vaxtı ilə saat 22:45-də start götürəcək.
Qurban Qurbanovun rəhbərlik etdiyi kollektiv I raundda Albaniya çempionu “Partizani”ni mübarizədən kənarlaşdırıb. Tiranada gerçəkləşmiş ilk matçda hesab açılmasa da, Bakıdakı oyunda Filip Ozobiç və Dani Kintananın qolları “Qarabağ”ı növbəti mərhələyə daşıyıb – 2:0.
"Dandolk" Azərbaycan təmsilçisi ilə qarşılaşan ilk İrlandiya klubu kimi tarixə düşəcək. Bu rəqib I təsnifat mərhələsində Latviya “Riqa”sını penaltilər seriyasında üstələyib - 5:4.
Son 5 mövsümdə avrokuboklarda qrupa düşməyi bacaran “Qarabağ”ın heyətində zədəli Bədavi Hüseynov meydana çıxa bilməyəcək. Əvəzində yeni transferlər – cinah müdafiəçisi Faysal Rerrars və hücumçu Maqaye Qeye İrlandiya çempionu ilə görüşlər üçün sifariş olunublar.
Qeyd edək ki, bu komandalar arasında cavab qarşılaşması iyulun 31-də Bakıdakı “Dalğa Arena”da olacaq. Matç saat 21:00-da start götürəcək.
Çempionlar Liqası
II təsnifat mərhələsi, ilk oyun
22:45. “Dandolk” (İrlandiya) – “Qarabağ” (Azərbaycan) - 1:1
Qollar: Patrik Hoban, 78 - Mahir Emreli, 4
Baş hakim: Bartoş Frankovski
Yan xətt hakimləri: Marçin Bonyek və Yakub Vinkler
Dördüncü hakim: Daniel Stefanski (hamısı Polşa)
Hakim-inspektor: Peter Froydfeldt (İsveç)
UEFA nümayəndəsi: Şarl Şak (Lüksemburq)
Dandolk. “Oriel Park” stadionu
