“Hansı səviyyədə hazır olduğumuzu hər halda çempionat oyunları göstərəcək. Əvvəlcədən nəsə demək düzgün olmaz".
Sportnet.az-ın məlumatına görə, bunu "Kəpəz"in baş məşqçisi Yaşar Vahabzadə mövsümün ikinci yarısına hazırlıq barədə klubun rəsmi saytına açıqlamasında deyib. O bildirib ki, hazırlıq üçün rəhbərlik normal şərait yaradıb: "Gəncədə təlim-məşq toplanışı keçib, Bakıda yoxlama oyunlarına çıxdıq. Düzdür, yoldaşlıq görüşləri ilə çempionat arasında fərq var. Mənə elə gəlir ki, komandanın hazırlığı normal vəziyyətdədir”.
Baş məşqçi komandanın heyətinə cəlb olunan futbolçular haqda da danışıb: “Kəpəz”in heyətinə qış fasiləsi müddətində yeni oyunçular dəvət etdik. Komandamız 6 futbolçu ilə güclənib. Rəqabətin olması yaxşıdır. Bu uşaqlara inanırıq. Komandaya adaptasiya olunublar. Bəziləri daha öncə də “Kəpəz”də oynayıb. Uşaqların arasında yaxşı münasibət var, bu da komandanın xeyrinədir”.
Aşağı liqada II dövrəyə XIV turun oyunları ilə start veriləcək. Tur çərçivəsində “Kəpəz” Bakı səfərində MOİK-in qonağı olacaq. Vahabzadə bu matçda yaxşı oyun göstərməyə çalışacaqlarını söyləyib: "Yaxşı oyun olan yerdə nəticə də olur. Hər ikisi bizim üçün vacibdir”.
Fevralın 6-da keçiriləcək MOİK - “Kəpəz” görüşünə Lökbatan Olimpiya İdman Kompleksinin stadionu ev sahibliyi edəcək. Saat 14:00-da başlayacaq oyunun baş hakimi Fərid Hacıyev olacaq.
