Futbol üzrə Avropa çempionatında yarımfinal mərhələsinə yekun vurulub.
Sportnet.az-ın məlumatına görə, bu raundun son görüşündə İngiltərə və Danimarka yığmaları üz-üzə gəliblər. Londondakı "Uembli" stadionunda oynanılan qarşılaşma meydan sahiblərinin 2:1 hesablı qələbəsi ilə başa çatıb.
Matçda hesabı Skandinaviya təmsilçisi açıb. 30-cu dəqiqədə Mikkel Damsqor cərimə zərbəsindən baxımlı qol vurub. Bu, ingilislərin AVRO-2020-də buraxdığı ilk top olub. Cəmi 9 dəqiqə sonra britaniyalılar tarazlığı bərpa ediblər. Danimarkanın kapitanı Simon Kyaer topu öz qapısından keçirib.
Görüşün əsas vaxtı 1:1 hesabı ilə başa çatdığından, əlavə vaxt oynanılıb. 104-cü dəqiqədə İniltərə millisinin kapitanı Harri Keynin yerinə yetirdiyi penalti zərbəsini Kasper Şmeyxel qaytarsa da, özünü topa hamıdan tez çatdıran hücumçu komandasının qələbə qolunu vurub. Beləliklə, ingilislər tarixində ilk dəfə finala vəsiqə qazanıblar. Onların həlledici oyundakı rəqibi İtaliya yığması olacaq.
Qeyd edək ki, final qarşılaşması iyulun 11-də "Uembli" stadionunda gerçəkləşəcək və Bakı vaxtı ilə saat 23:00-da başlayacaq.
--------------------------------
Bu gün futbol üzrə Avropa çempionatında yarımfinal mərhələsinə yekun vurulacaq.
Sportnet.az-ın məlumatına görə, bununla da turnirin ikinci finalçısının adına aydınlıq gələcək.
Həlledici görüşə son vəsiqə uğrunda İngiltərə və Danimarka yığmaları üz-üzə gələcək. Londondakı "Uembli" stadionunda keçiriləcək qarşılaşma Bakı vaxtı ilə saat 23:00-da start götürəcək. Matçı Niderlanddan olan FIFA referisi Denni Makkeli idarə edəcək.
AVRO-2020-də qol buraxmayan britaniyalılar doğma meydan amilindən də istifadə edib finala çıxmaq niyyətindədir. Danimarkalılar isə turnirin əsas favoritlərindən birini mübarizədən kənarlaşdırmaqla sensasiya etmək arzusundadır.
Avropa çempionatı
Yarımfinal
23:00. İngiltərə - Danimarka - 2:1 (ƏLAVƏ VAXT)
Qollar: Simon Kyaer, 39 (avtoqol), Harri Keyn, 104 - Mikkel Damsqor, 30
Baş hakim: Denni Makkeli (Niderland)
London, "Uembli" stadionu
Qeyd edək ki, bu oyunun qalibi finalda İtaliya millisinin rəqibi olacaq.
