Futbol üzrə Azərbaycan Kubokunda 1/4 final mərhələsinə yekun vurulub.
Sportnet.az-ın məlumatına görə, bununla da yarımfinalın bütün iştirakçıları müəyənləşib.
1/4 finalın son matçında "Zirə" klubu "Səbail"in qonağı olub. "ASCO Arena"dakı qarşılaşma "qartallar"ın inamlı qələbəsi ilə başa çatıb - 3:1.
Görüşdə hesabı 7-ci dəqiqədə meydan sahibləri açıblar. Ruslan Hacıyev uzaq məsafədən baxımlı qola imza atıb. 21-ci dəqiqədə Ağabala Ramazanov tarazlığı bərpa edib. 39-cu dəqiqədə Təmkin Xəlilzadə penaltidən fərqlənməklə qonaqları önə keçirib. Oyunda son nöqtəni isə Coşqun Diniyev qoyub. Azərbaycan millisinin yarımmüdafiəçisi 73-cü dəqiqədə əla zərbə ilə yekun hesabı müəyyənləşdirib.
Beləliklə, ilk görüşdə 4:0 hesablı qələbə qazanmış "Zirə" iki oyunun nəticəsinə əsasən, adını yarımfinala yazdırıb. Rəşad Sadıqovun baş məşqçi olduğu komanda finala gedən yolda "Neftçi" ilə qarşılaşacaq. Digər yarımfinal cütündə isə "Qəbələ" və "Qarabağ" komandaları üz-üzə gələcəklər. İlk oyunlar aprelin 20-də, cavab matçları isə aprelin 29-da gerçəkləşəcək.
--------------------------------------
Futbol üzrə Azərbaycan Kubokunda 1/4 final mərhələsinin daha bir cavab görüşü keçirilib.
Sportnet.az-ın məlumatına görə, "Qəbələ" evdə "Sumqayıt"la qarşılaşıb. Oyun 1:1 hesabı ilə yekunlaşıb.
Matdçda ilk qolu meydan sahibləri vurublar. 18-ci dəqiqədə İsnik Alimi adını tabloya yazdırıb. Qonaqların bərabərlik qoluna isə yeni transfer Araz Abdullayev imza atıb. 82-ci dəqiqədə penaltidən fərqlənən 30 yaşlı yarımmüdafiəçi Azərbaycana qayıdışını qolla qeyd edib.
İlk oyunda 1:0 hesablı qələbə qazanmış "Qəbələ" doğma meydandakı heç-heçədən sonra yarımfinala adlayıb. "Qırmızı-qaralar"ın bu raunddakı rəqibi "Qarabağ" olacaq.
Qeyd edək ki, 1/4 finalın son matçında "Zirə" "Səbail"in qonağı olacaq. "Qartallar" ilk matçda rəqibini 4:0 hesabı ilə darmadağın edib. Cütün qalibi yarımfinalda "Neftçi"yə rəqib olacaq.
------------------------------------------
Bu gün Azərbaycan Kubokunda 1/4 final mərhələsinin son iki cavab görüşü keçiriləcək. Sportnet.az-ın məlumatına görə, qarşılaşmalardan biri Bakıda, digəri Qəbələdə təşkil olunacaq.
Əvvəlcə "Qəbələ" "Sumqayıt"ı qəbul edəcək. İlk matçda "qırmızı-qaralar" səfərdə 1:0 hesablı qələbə qazanıblar. Premyer Liqada işləri heç də yaxşı getməyən "gənclik şəhəri" təmsilçisi üçün bu oyun avrokubok yolunda son şans sayıla bilər. Səfər öncəsi komandanın baş məşqçisi Aleksey Baqa yarımfinala adlama imkanlarını kifayət qədər yüksək qiymətləndirib. İki görüşün nəticəsində qalib olacaq kollektivi yarımfinalda "Qarabağ"la daha ağır sınaq gözləyəcək.
Paytaxtdakı "ASCO Arena"da isə "Səbail" "Zirə"ni qəbul edəcək. İlk oyunda Rəşad Sadıqovun komandası 4:0 hesabı ilə qalib gəldiyindən, bugünkü meydan sahiblərinin belə ağır məğlubiyyətin əvəzini çıxacağı inandırıcı görünmür. Cütün qalibi yarımfinalda "Neftçi"yə rəqib olacaq.
13 fevral (bazar)
Azərbaycan Kuboku
1/4 final, cavab görüşləri
15:00. “Qəbələ” – “Sumqayıt” - 1:1
Qollar: İsnik Alimi, 18 - Araz Abdullayev, 82 (pen.)
Hakimlər: Kamal Umudlu, Rəhman İmami, Vüsal Məmmədov, Fərid Hacıyev
Hakim-inspektor: Feyzulla Feyzullayev
AFFA nümayəndəsi: Mübariz Hüseynov
Qəbələ şəhər stadionu
İlk oyun - 1:0
18:00. “Səbail” – “Zirə” - 1:3
Qollar: Ruslan Hacıyev, 7 - Ağabala Ramazanov, 21. Təmkin Xəlilzadə, 39. Coşqun Diniyev, 73
Hakimlər: Əliyar Ağayev, Cavanşir Yusifov, Müslüm Əliyev, Rauf Cabarov
Hakim-inspektor: Əmrah İbrahimov
AFFA nümayəndəsi: Maşallah Əhmədov
“ASCO Arena”
İlk oyun - 0:4
Qeyd edək ki, ilk iki yarımfinalçıdan "Qarabağ" "Keşlə"ni (1:0, 6:0), "Neftçi" isə "Sabah"ı (1:1, 3:1) üstələyib.
