Futbol üzrə Azərbaycan Premyer Liqasında ilk turun növbəti oyunu keçirilib.
Sportnet.az-ın məlumatına görə, "Azersun Arena"da "Qarabağ" və "Səbail" komandaları üz-üzə gəlib.
FIFA referisi Rauf Cabbarovun idarə etdiyi qarşılaşma meydan sahiblərinin qələbəsi ilə yekunlaşıb - 3:1.
Hesabı 42-ci dəqiqədə "Qarabağ"ın hücumçusu Musa Qurbanlı açıb. İlk yarıya əlavə olunmuş ikinci dəqiqədə Ramil Şeydayev Leandro Andradeyə qarşı kobudluqdan sonra təyin olunmuş penaltini dəqiq yerinə yetirib.
İkinci hissəyə də sürətli başlayan Ağdam komandası 47-ci dəqiqədə 3-cü qolu vurub. Bu dəfə də Şeydayev fərqlənib.
Qonaqlar təsəlli qoluna 71-ci dəqiqədə imza atıblar. Elmir Tağıyev qapıçı və müdafiəçilərin bir-birilərini başa düşməmələrindən sonra ona gələn topu boş qapıya göndərib.
Qeyd edək ki, turun açılış oyununda "Zirə" səfərdə "Kəpəz"i yenib - 2:1. Avqustun 7-də "Şamaxı" - "Neftçi" və "Sabah" - "Sumqayıt", avqustun 8-də isə "Turan" - "Qəbələ" görüşləri keçiriləcək.
-------------------------
Bu gün futbol üzrə Azərbaycan Premyer Liqasında ilk turun növbəti oyunu keçiriləcək.
Sportnet.az-ın məlumatına görə, son çempion "Qarabağ" "Azersun Arena"da "Səbail"i qəbul edəcək. FIFA referisi Rauf Cabbarovun idarə edəcəyi qarşılaşma saat 20:00-da başlayacaq.
"Köhlən atlar" bu görüşdə 2 aparıcı futbolçusunun xidmətindən yararlana bilməyəcək. Müdafiəçilər Maksim Medvedevlə Kevin Medina zədə səbəbindən mövsümün ilk oyununu buraxacaqlar. "Səbail" isə yeni baş məşqçisi Mahmud Qurbanovun rəhbərliyi altında ilk rəsmi matçına çıxacaq.
Komandalar indiyədək ölkə çempionatında 19 dəfə üz-üzə gəliblər. Bunların 15-i Ağdam klubunun, 2-si paytaxt təmsilçinin xeyrinə başa çatıb. 2 qarşılaşmada qalib müəyyənləşməyib. Topların nisbətində də "köhlən atlar"ın aşkar üstünlüyü var - 38:7.
“Qarabağ” son 6 ev oyununda qələbə qazanıb. Son 4 oyunda üç və ya daha çox qol vurulub.
Azərbaycan Premyer Liqası
I tur
6 avqust
20:00. “Qarabağ” – “Səbail” - 3:1
Qollar: Musa Qurbanlı, 42. Ramil Şeydayev, 45+2 (pen.); 47 - Elmir Tağıyev, 71
Hakimlər: Rauf Cabarov, Namiq Hüseynov, Cavanşir Yusifov, Nicat İsmayıllı
VAR hakimi: Fərid Hacıyev
VAR hakiminin köməkçisi: Cəmil Quliyev
Hakim-inspektor: Babək Quliyev
“Azersun Arena”.
Qeyd edək ki, mövsümün açılış oyununda "Zirə" "Kəpəz"ə 2:1 hesabı ilə qalib gəlib. Tura avqustun 7-də keçiriləcək "Şamaxı" - "Neftçi", "Sabah" - "Sumqayıt" və avqustun 8-də oynanılacaq "Turan Tovuz" - "Qəbələ" görüşləri ilə yekun vurulacaq.
