Azərbaycan Premyer Liqasında XXIX tura yekun vurulub.
Sportnet.az xəbər verir ki, son oyun “Neftçi Arena”da keçirilib.
Turnir cədvəlində qonşu olan komandalar - “Neftçi” ilə “Sumqayıt” üz-üzə gəliblər. Görüşdə hesabı qonaqlar açıblar. 13-cü dəqiqədə Yuri Matias avtoqol müəllifi olub.
“Neftçi”nin cavab qolu özünü 60 dəqiqə gözlədib. Belə ki, 73-cü dəqiqədə kapitan Emin Mahmudov “status-kvo”nu bərpa edib. Yarımmüdafiəçinin penalti zərbəsini qapıçı qaytarsa da, Mahmudov dönən topu ikinci cəhddə qapıdan keçirə bilib.
Qarşılaşma 1:1 hesabı ilə yekunlaşıb. Bununla xallarının sayını 44-ə çatdıran “Neftçi” turnir cədvəlində üçüncü pilləyə düşüb. Dördüncü sıradakı “Sumqayıt”ın hesabında isə 43 xal var.
Turun əvvəlki oyunlarında “Kəpəz” “Araz-Naxçıvan”ı (2:1), “Turan Tovuz” “Sabah”ı (2:0), “Qarabağ” “Səbail”i (4:2), “Zirə” isə “Qəbələ”ni (4:0) məğlub edib.
Qeyd edək ki, XXX turun matçları 12-14 apreldə keçiriləcək.
---------------------------------
Azərbaycan Premyer Liqasında XXIX tur davam edir.
Sportnet.az xəbər verir ki, bu gün daha bir oyun keçirilib.
“Zirə” və “Qəbələ” komandaları birincilərin meydanında üz-üzə gəliblər. Dörd gün əvvəl baş tutan Azərbaycan Kubokunun yarımfinal oyununda olduğu kimi, bakılılar yenə meydandan qalibiyyətlə ayrılıblar. Ancaq bu dəfə daha böyük hesab qeydə alınıb.
Rəşad Sadıqovun yetirmələri artıq birinci hissədə rəqib qapısından 3 top keçiriblər. 4-cü dəqiqədə Rəhim Sadıxov hesabı açıb. 25-ci dəqiqədə Rafael Utziq, iki dəqiqə sonra isə Ceyhun Nuriyev adlarını tabloya yazdırıblar.
57-ci dəqiqədə Fuad Bayramov fərqi 4 topa çatdırıb. Beləliklə, rəqibi üzərində 4:0 hesablı qələbə qazanan “Zirə” xallarının sayını 45-ə çatdırıb və ikinci pilləyə yüksəlib. Sonuncu sıradakı “Qəbələ”nin isə hesabında 16 xal var.
Qeyd edək ki, turun əvvəlki oyunlarında “Kəpəz” “Araz-Naxçıvan”ı (2:1), “Turan Tovuz” “Sabah”ı (2:0), “Qarabağ” isə “Səbail”i (4:2) məğlub edib. Tura bu gün keçiriləcək “Neftçi” - “Sumqayıt” matçı ilə yekun vurulacaq.
--------------------------------------
Bu gün Azərbaycan Premyer Liqasında XXIX tura yekun vurulacaq.
Sportnet.az xəbər verir ki, son oyun günündə 2 qarşılaşma baş tutacaq.
Günün ilk qarşılaşmasında "Zirə" "Qəbələ"ni qəbul edəcək. Görüş saat 16:30-da başlayacaq.
Turun son matçında isə "Neftçi" və "Sumqayıt" komandaları üz-üzə gələcəklər. "Neftçi Arena"dakı görüşün start fiti saat 20:00-da veriləcək.
AFFA nümayəndəsi: Mübariz Hüseynov
Zirə İdman Kompleksinin stadionu.
AFFA nümayəndəsi: Seymur Səlimli
"Neftçi Arena".
