Avstriya hazırlığını davam etdirən "Neftçi" klubu daha bir futbolçu transfer edib. Sportnet.az-ın məlumatına görə, Azərbaycan millisinin və "Sumqayıt"ın hücumçusu Məhəmməd Qurbanovla 2 illik müqavilə bağlanılıb.
Yeni transfer 14 nömrəli "ağ-qara" formanı geyinəcək. Bu, "Neftçi"nin Xuan Alvaradodan sonra ikinci rəsmi transferi olub.
Qeyd edək ki, Məhəmməd Qurbanovun yığma karyerası 2008-ci ildə başlayıb. Həmin il Azərbaycanın U-17 komandasına dəvət edilmiş futbolçu Avropa çempionatının seçmə mərhələ oyunlarında meydana çıxıb. Sonralar U-19 və U-21 milli komandalarımıza çağırılmış hücumçu qitə miqyaslı yarışların iştirakçısı olub. Bu ildən isə Qurbanov əsas milliyə dəvət edilib. Klub karyerasına Rusiyada başlamış futbolçu "Rostov" və "Taqanroq" klublarının da formasını geyinib. Ötən mövsüm isə o, "Sumqayıt"ın heyətində meydana çıxıb.
