Azərbaycan milli komandasının futbolçuları Rauf Əliyev, Əfran İsmayılov və Cavid Hüseynovun "Bakı"nın əsas komandası ilə birgə məşq etməmələrinin səbəbi müəyyənləşib. Bu barədə Sportnet.az-a klubun vitse-prezidenti Yaşar Seyidov məlumat verib.
Onun sözlərinə görə, hər 3 oyunçu əmək haqlarının ödənilməməsi səbəbindən fərdi məşqlərlə kifayətlənirlər. Seyidov bildirib ki, Əliyev, İsmayılov və Hüseynov iddialı komandalarda çıxış etmək istəyindədirlər. Lakin onların müqavilələri davam etdiyindən, "Bakı"dan ayrıla bilmirlər. Bu səbəbdən, futbolçular fərdi məşqlərlə kifayətlənirlər. Klub rəsmisi yaxın günlərdə hər 3 oyunçunun "Bakı"da qalacağına və ya ayrılacağına dair qərar veriləcəyini əlavə edib.
Qeyd edək ki, "Bakı"da ciddi maliyyə problemləri yaranıb. Hətta klubun dağılma təhlükəsi ilə üzləşdiyi bildirilir.
