Yeni mövsümün hazırlıqlarını davam etdirən "Qarabağ" klubu daha bir futbolçu ilə güclənib. Sportnet.az-ın məlumatına görə, Danilo Dias və Tərlan Quliyevin ardından Cavid Tağıyev də transfer edilib.
Tovuz futbolun yetirməsi olan 22 yaşlı yarımmüdafiəçi ilə 3 illik müqavilə bağlanılıb. O, "Qarabağ"da 77 nömrəli formanı geyinəcək.
Tağıyev "Qarabağ"ın saytına açıqlamasında iddialı komandaya keçidini özü üçün irəli addım saydığını bildirib: "Bilirəm ki, çempion komandaya gəlmişəm. İddialı komandaya keçidimi irəli atılmış addım kimi qiymətləndirirəm. Sağ olsunlar, komandada məni mehriban qarşıladılar. "Qarabağ"dan təklif gələndə hara getdiyimi çox yaxşı anladım. Bilirəm ki, komandada istənilən mövqedə rəqabət var. Hər şey özümdən asılıdır. Məşqlərdə maksimum çalışıb özümü göstərməliyəm. Əgər Qurban Qurbanov məni komandasında görmək istəyibsə buna ancaq sevinə bilərəm. Onun və bütün "Qarabağ" camiəsinin etimadını doğrultmaq üçün var gücümlə çalışacağam. "Qarabağ"a uğur qazanmaq üçün gəlmişəm və yeni komandamda meydana çıxacağım günü səbirsizliklə gözləyirəm".
