"İrina Kindzerskaya ötən il azərbaycanlı idmançıya ərə gedib. O, hələ həmin vaxt Azərbaycana getmək istədiyini bildirmişdi. Lakin hamımız buna qarşı idik və qalması üçün onu razı saldıq. İrina bir müddət əvvəl keçirilən Avropa çempionatından əvvəl təşkil olunan təlim-məşq toplanışında bizimlə idi. Ancaq o, heyətə düşmədi, yarışa Svetlana Yaremka və Yelizaveta Kalanina getdi. Ola bilər ki, bu amil qərarına təsir göstərdi. Danışıqları onun həyat yoldaşı aparırdı və Ukrayna Cüdo Federasiyasından Azərbaycan yığmasına keçmək üçün razılıq ala bildi”. Sportnet.az-ın məlumatına görə, bunu cüdo üzrə Ukrayna milli komandasının baş məşqçisi Vitali Dubrova İrina Kindzerskayanın Azərbaycan yığmasına keçidini "NewsOne” portalına şərh edərkən deyib.
V.Dubrova bildirib ki, 26 yaşlı xanım cüdoçunun nigahı saxta deyil. O, həmyerlisinin Azərbaycan yığmasına keçidinə təəsüfləndiyini söyləyib: "Onun nigahı saxta deyil. İra ötən ilin əvvəlində azərbaycanlıya ərə gedib. Artıq xeyli vaxtdır ki, pasportunda İrina Əliyeva yazılıb. Bu da bir amildir – onun ailə xoşbəxtliyinə mane olmaq istəməzdim. Həmçinin maliyyə baxımından Azərbaycanla Ukrayna arasında fərq var”.
Baş məşqçi Ukrayna yığmasının digər perspektivli cüdoçularını heyətdə saxlamaq üçün maliyyə şərtlərinin yaxşılaşdırılmalı olduğunu ifadə edib. V.Dubrova Ukrayna Cüdo Federasiyanın möcud durumdan xəbərdar olduğunu vurğulayıb: "Bütün gücümüzlə digər idmançıları saxlamalıyıq. Azərbaycan kimi super səviyyədə olmasa da, burada da maliyyə durumunun yaxşılaşacağına ümid edirik. Məşqçi kimi xəbərdarlıq etdim ki, vəziyyət düzəlməsə, bu proses bircə Kindzerskaya ilə yekunlaşmayacaq. Digərlərini də saxamaq çətin olacaq”.
Yeri gəlmişkən, İ.Kindzerskayanın Azərbaycanda aylıq maaşı da açıqlanıb. Onun əmək haqqı 2 min dollar təşkil edəcək. Üstəlik, nəticələrdən asılı olaraq, bonuslar da olacaq.
Qeyd edək ki, Azərbaycan Cüdo Federasiyası mayın 1-də İrina Kindzerskayanın yığmaya cəlb olunduğunu açıqlayıb.
