Çexiyanın "Mlada Boleslav" klubunun baş məşqçisi Karel Yarolim Avropa Liqasının II təsnifat mərhələsindəki potensial rəqibləri barədə danışıb. Sportnet.az-ın Çexiya mətbuatına istinadən məlumatına görə, mütəxəssis I təsnifat mərhələsi çərçivəsində Bosniya və Herseqovinanın "Şiroki Brieq" və Azərbaycanın "Qəbələ" klubları arasında keçiriləcək görüşdə qələbəsini arzuladığı komandanı açıqlayıb.
O, bosniyalı futbolçusu Jasmin Skukdan "Şiroki Brieq" barəsində dolğun məlumat topladığını və bu klubun zəif təsir bağışladığını öyrəndiyini söyləyib. Bununla yanaşı, klub prezidenti Yozef Dufekin də bosniyalılarla qarşılaşmaq arzusunda olduğunu bildirən Yarolim fərqli mövqe ortaya qoyub: "II təsnifat mərhələsində "Qəbələ" ilə qarşılaşmağımızı istəyərdim. Bunun bir neçə səbəbi var. Əvvəla, bu komanda avrokubokun debütantıdır və belə mötəbər yarışda təcrübələri yoxdur. İkincisi, Azərbaycanda 2 dəfə olmuşam və ən xoş təəssüratlarla ayrılmışam".
Çexiyalı mütəxəssis potensial rəqibləri haqda maksimum informasiya toplamağı planlaşdırdıqlarını da vurğulayıb: "Bütün hallarda "Şiroki Brieq" - "Qəbələ" oyunlarını izləməliyik. Kimdənsə məlumat almaqdansa, bu kollektivlərin oyunlarını canlı seyr etməyimiz məsləhətdir. Ən azı bir oyunu canlı izləyəcəyik. Stadiona ya özüm gedəcəyəm, ya da köməkçim Boris Kuçeranı göndərəcəyəm. Əlbəttə, kiminlə qarşılaşacağımızı biz müəyyənləşdirə bilmərik. Ancaq bu oyunlara maksimum hazırlaşmaq şansımızdan yararlanmalıyıq".
Qeyd edək ki, Karel Yarolim "Slaviya"nın baş məşqçisi iki dəfə Azərbaycana gəlib. Onun komandası əvvəlcə 2010-2011-ci il mövsümündə Çempionlar Liqasının II təsnifat mərhələsi çərçivəsində Bakıda "Şəmkir"i 4:1, 2006-2007-ci il mövsümündə UEFA Kubokunun II təsnifat mərhələsinin oyununda isə "Karvan"ı 2:0 hesabı ilə məğlub edib. Hər iki halda "Slaviya" növbəti mərhələyə adlayıb.
