Azərbaycan Premyer Liqasının III turunda “Turan Tovuz” səfərdə “Neftçi”ni məğlub edib. Matçdan sonra “Turan Tovuz”un futbolçusu Ayxan Hüseynov Sportnet.az-a müsahibə verib...
– Rəqib haqqında nə deyə bilərsiniz?
– Daha çox hücuma oynayırlar, yaxşı futbolçular gəlib. Açığı, necə qol vurduğumuza biz də inanmadiq. Amma bəxtimiz gətirdi. Sevinirik ki, nəticəni qoruya bildik və yaxşı müdafiə olunduq.
– “Neftçi” ilə oyun atmosferi gərgin idi?
– “Neftçi” ilə oynayanda həmişə ab-hava bir az ağır olur, hamı görüşə daha motivasiyalı çıxır. Bilirdik ki, belə oyun olacaq, çoxlu mübarizə gedəcək. “Neftçi” də çox motivasiyalı idi, onların da qol epizodları oldu, amma biz yaxşı müdafiə olunduq.
– Bu oyuna hansı hədəflə gəlmişdiniz?
– Biz sırf 3 xal üçün gəlmişdik. Çünki keçən oyunda məğlub olmuşduq, ağır oyun idi. Uduzmaq istəmirdik, buna görə bu oyuna daha yaxşı hazırlaşmışdıq.
– Hakimlərin idarəçiliyini necə qiymətləndirirsiniz?
– Hakimlərlə bağlı danışmaq istəmirəm. Dedilər ki, İqor Ribeyronun epizodunda təmiz qırmızı vərəqə var idi. Başqa cəhətdən isə oyun normal idi.
– Meydançanın vəziyyəti ilə bağlı fikriniz necədir?
– Bilmirəm nəyə görə belədir. “Azərsun Arena”da da meydança eyni vəziyyətdə idi, burada da. Bu, futbolçular üçün bir az çətindir.
