Bu gün Azərbaycan Premyer Liqasında XIII turun son oyunları keçiriləcək.
Sportnet.az-ın məlumatına görə, qarşılaşmalar yenə bölgələrdə təşkil olunacaq.
"Şamaxı" eyniadlı şəhər stadionunda "Sumqayıt"ı qəbul edəcək. Hər iki komada ötən tur qələbə qazana bilməyib. "Şamaxı" səfərdə "Sabah"la qolsuz heç-heçə edibsə, "Sumqayıt" öz meydanında "Qarabağ"a uduzub. Hazırda bu komandalar müvafiq olaraq, 14 xalla 9-cu və 20 xalla 5-ci yerdə qərarlaşıblar.
Şəxsi oyunlara gəlincə, “Şamaxı” 48 matçın 21-dən qələbə, 13-dən məğlubiyyətlə ayrılıb. 14 görüşdə isə heç-heçə qeydə alınıb. Topların nisbətində də bu kollektiv öndədir - 66:49. “Şamaxı” son 5 matçda qol vurub. “Sumqayıt” isə axırıncı 2 səfərdə uduzub.
Turun son matçında "Qəbələ" "Araz-Naxçıvan"ı sınağa çəkəcək. Hər iki komanda ötən turu qələbəsiz başa vurub. "Qəbələ" səfərdə "Zirə"yə 0:1 hesabı ilə uduzduğu halda, "Araz-Naxçıvan" "Turan Tovuz"la heç-heçə edib - 1:1. Bugünkü rəqiblər müvafiq olaraq, 5 xalla 11-ci və 20 xalla 6-cı yerdə gedirlər.
İki kollektiv indiyədək 5 dəfə üz-üzə gəlib. "Qəbələ" 1, "Araz-Naxçıvan" 3 qələbə qazanıb. 1 oyunda heç-heçə qeydə alınıb. Topların nisbətində Naxçıvan təmsilçisi öndədir - 9:5. “Qəbələ” son 4 oyunda qol vurub. “Araz-Naxçıvan” bütün səfərlərdə qol buraxıb.
Azərbaycan Premyer Liqası, XIII tur
30 noyabr (bazar)
14:00. “Şamaxı” – “Sumqayıt”
Hakimlər: Tural Qurbanov, Asiman Əzizli, Tərlan Talıbzadə, Vüqar Həsənli
VAR: Elçin Məsiyev
AVAR: Şirmamed Mamedov
Hakim-inspektor: Ramil Diniyev
AFFA nümayəndəsi: Emin Cəfərov
Şamaxı şəhər stadionu
16:30. “Qəbələ” – “Araz-Naxçıvan”
Hakimlər: Kamal Umudlu, Vüsal Məmmədov, Namiq Hüseynov, Əkbər Əhmədov
VAR: Rauf Cabarov
AVAR: Kamran Əliyev
Hakim-inspektor: İmanxan Sultani
AFFA nümayəndəsi: Namiq Əliyev
Qəbələ şəhər stadionu.
