AFFA-nın baş katibi Elxan Məmmədov stadionlara azarkeşlərin cəlb edilməsi ilə bağlı maraqlı təklif irəli sürüb. Sportnet.az-ın məlumatına görə, Məmmədov elita təmsilçilərinə heyətlərini 1 dünya şöhrətli ulduzla gücləndirməyi tövsiyə edib.
AFFA rəsmisi fikirlərini belə əsaslandırıb: "İtaliya yığmasının heyətində dünya çempionu titulunu qazanmış Canluka Zambrotta AFFA-nın layihələrindən birində iştirak edirdi. Küçədə onunla gəzişərkən kəlimə kəsə bilmirdim. İnsanlar yaxınlaşaraq, şəkil çəkdirirdilər. Belə ulduz futbolçular klublarımıza cəlb edilsə stadionlara gələn tamaşaçıların sayı da artar. DÇ-2014-ün seçmə qrup mərhələsində Portuqaliya yığması ilə Bakıdakı oyuna əksər biletlər Kriştianu Ronaldonun oynamayacağı məlum olanadək satıldı. "Real Madrid"in ulduzunun sarı vərəqə limitinin dolduğu bilindikdən sonra fanatların bu görüşə marağı azaldı. Hətta ona dedim ki, sarı vərəqəni gərək gec alardın".
