Avropa Liqasındakı təmsilçimiz olan "Qəbələ" II təsnifat mərhələsinin cavab oyununda MTK ilə qarşılaşdı. İlk oyunu Budapeştdə 2:1 qazanan qırmızı-qaralar bu dəfə doğma meydanda rəqibi məğlub edib növbəti mərhələyə vəsiqə qazanmaq istəyirdi və belə də oldu.
Oyuna azarkeşlərin marağı kifayət qədər idi. Onlar sonadək doğma komandalarını dəstəklədilər və əbəs yerə "12-ci oyunçu" adlandırılmadıqlarını sübuta yetirdilər.
Matça gözlənildiyi kimi, "Qəbələ" aktiv başladı. İlk dəqiqələrdən rəqib qapısı qarşısında tez-tez görünən "Qəbələ" erkən qol vurmağı da bacardı. 7-ci dəqiqədə mərkəzdən gerçəkləşən hücumda Baqali Dabonun rəqib müdafiə xəttinin arasında atdığı gözəl ötürməni Sergey Zenyov qola çevirdi- 1:0. Bundan sonra isə "Qəbələ" rəqibə oynamaq şansı verdi, amma MTK bu şansı dəyərləndirə bilmədi.
İlk hissənin sonlarına yaxın təşəbbüsü yenidən ələ alan Roman Qriqorçukun baş məşqçi olduğu komanda fərqi 2 topa çıxardı. Sağ cinahdan yerinə yetirilən cərimə zərbəsində yenə Baqali Dabonun ötürməsindən sonra bu dəfə Teo Uiks fərqləndi. Bu, həmçinin Uiksin cari mövsüm Avroliqada vurduğu 5-ci qol oldu. İlk hissə elə bu hesabla da sona çatdı.
İkinci hissə başladığında isə MTK-nın turu keçməsi üçün möcüzə lazım idi. Amma "Qəbələ" möcüzənin reallaşmasına icazə vermədi. MTK hesab arasındakı fərqi azaltmağa ümidli idi. Lakin çox keçmədən bunun mümkünsüz olduğunu gördülər və məğlubiyyətlə barışmalı oldular. İkinci hissədə tərəflər oyunda hesabı dəyişə bilmədilər. Final fiti ilə birlikdə isə "Qəbələ" növbəti tura adını yazdırmış oldu.
"Kəpəz" və "Neftçi"nin Avroliqa ilə vidalaşması fonunda "Qəbələ" turnirdə mübarizəni davam etdirəcək. III təsnifat mərhələsində isə rəqib Fransa təmsilçisi "Lill" olacaq. Təmsilçimizi iki çətin oyun gözləyir. Gəlin ümid edək ki "Qəbələ" bu dəfə də bizi sevindirəcək. Niyə də olmasın?!
Xatırladaq ki, ilk oyun iyulun 28-də səfərdə, cavab qarşılaşması isə 4 avqustda Bakıda baş tutacaq.
Tamerlan İBRAHİMLİ
