"Qəbələ" Azərbaycanın avrokuboklarda cari mövsümdə təmsilçiləri arasında ən yüksək göstəriciyə imza atan klub olub. Sportnet.az-ın məlumatına görə, Roman Qriqorçukun komandası buna Avropa Liqasının II təsnifat mərhələsində Macarıstanın MTK klubunu hər 2 oyunda məğlub etməklə (səfərdə 2:1, evdə 2:0) maksimum xal toplayıb. Bu, ölkəmizin UEFA-dakı reytinqinə 0.500 xal yazdırmaq demək olub.
"Qırmızı-qaralar" ilk təsnifat mərhələsində Gürcüstan "Samtredia"sı ilə matçlarda maksimum nəticə göstərə bilməmişdi - evdə 5:1, səfərdə 1:2. Avropa Liqasında mübarizəni artıq dayandıran "Kəpəz"lə "Neftçi" də təsnifat mərhələsində 2 oyundan ən yaxşı halda 1-də qalib gələ bildilər. Çempionlar Liqasında təmsilçimiz olan "Qarabağ" isə II təsnifat mərhələsində Lüksemburqun "Düdelanj" klubunu evdə 2:0 hesablı qələbə, səfərdə 1:1 hesablı heç-heçə ilə keçdi.
"Kəpəz"lə "Neftçi" avrokubokları hərəyə 0.375 xalla tərk etdilər. Nəticə eyni oldu - 1 qələbə, 1 heç-heçə, 2 məğlubiyyət. Sadəcə, "Neftçi" top fərqində gəncəlilərdən yaxşı göstəriciyə imza atdı (3-3). "Kəpəz" isə mənfi saldoya malik oldu (1-3).
"Qarabağ" da 0.375 xal toplasa da, mübarizəni davam etdirdiyindən nəticəsini yaxşılaşdırmaq imkanına malikdir. "Qəbələ" isə 4 oyundan 3 qələbə, 1 məğlubiyyətlə 0.750 xal qazanıb. Ümumilikdə ölkəmiz avrokuboklarda 8 oyundan sonra 1.875 xala malikdir.
"Qəbələ" 2014-cü ildən çıxış etdiyi avrokuboklarda ilk dəfə bir mərhələdə hər 2 oyunda qalib gəlib. Roman Qriqorçukun komandası ötən mövsüm ilk 3 təsnifat mərhələsində oyunlardan uzağı 1-də qalib gəlmiş, pley-offda isə heç-heçə edərək (evdə 0:0, səfərdə 2:2) qrupa səfər qolu ilə düşmüşdü. "Qırmızı-qaralar" ötən 14 oyundan 3 qələbə qazanmışdısa, indi 4 matçdan sonra artıq 3 qələbəsi var. Bununla da "Qəbələ" avrkuboklarda hesabına 6-cı qələbəni yazıb.
Mehman Süleymanov
AFFA yanında Media Komitəsi tərəfindən maliyyələşdirilib
