Sabah "Qarabağ" Çempionlar Liqasında növbəti oyununa çıxacaq. Sportnet.az-ın məlumatına görə, Qurban Qurbanovun komandası III təsnifat mərhələsinin ilk oyunu çərçivəsində Çexiyada "Viktoriya"nın qonağı olacaq. Plzen şəhərindəki matç Bakı vaxtilə saat 22:15-də başlayacaq.
Ağdam klubu ardıcıl 3-cü mövsüm turnirin bu mərhələsinin iştirakçısı olur. Ancaq bunadək nə Avstriyanın "Zalsburq" (evdə 2:1, səfərdə 0:2), nə də "Seltik"i (səfərdə 0:1, evdə 0:0) keçmək mümkün olub. İndi Qurban Qurbanovun komandası yeni tarix yazmaq yolunda ilk sınağına çıxacaq. Səfərdən münasib nəticə ilə qayıtmaq ilk dəfə ÇL-in pley-off mərhələsində iştirak etmək şansımızı artıracaq.
"Qarabağ" ötən mövsüm də III təsnifat mərhələsinin ilk matçını səfərdə keçirmişdi. Onda Şotlıandiyaya yollanan ağdamlılar sona yaxın buraxdığı qolla uduzmuş və gəmin minimal hesablı məğlubiyyətin əvəzini evdə çıxa bilməmişdi. "Viktoriya" nə qədər güclü rəqib olsa da, "Seltik" qədər adlı-sanlı, çoxsaylı titullara malik klub olmamağı mərhələ keçmək şansımıza nikbin baxmağa əsas verir.
