Elxan Məmmədov UEFA İcraiyyə Komitəsinə üzv seçiləcəyi təqdirdə də AFFA-nın baş katibi vəzifəsində fəaliyyətini davam etdirə biləcək. SPortnet.az-ın məlumatına görə, bu barədə "Report"a AFFA-nın İnformasiya və İctimaiyyətlə Əlaqələr Departamentinin rəisi Mikayıl Nərimanoğlu açıqlama verib.
"UEFA reqlamentinə əsasən, qitə futbol qurumunun İcraiyyə Komitəsinin üzvü təmsil olunduğu milli assosiasiyada aktiv futbol fəaliyyəti ilə məşğul olmalıdır. Bu səbəbdən, Elxan Məmmədov UEFA İcraiyyə Komitəsinin üzvü seçiləcəyi təqdirdə, AFFA-dakı işindən ayrılmayacaq" deyə M.Nərimanoğlu bildirib.
Qeyd edək ki, Elxan Məmmədovun UEFA İcraiyyə Komitəsinə üzv kimi namizədliyinin irəli sürülməsi barədə qərar AFFA İcraiyyə Komitəsinin fövqəladə iclasında verilib. Seçki 2017-ci il aprelin 5-də Finlandiyanın paytaxtı Helsinkidə UEFA-nın növbəti Konqresi çərçivəsində keçiriləcək.-96
