Cənubi Afrika Respublikası (CAR) yığmasının yeni baş məşqçisi Stüart Bakster səfərdə Nigeriya ilə keçirəcəkləri 2019-cu il Afrika Millətlər Kubokunun seçmə oyunu üçün heyəti açıqlayıb. Sportnet.az-ın məlumatına görə, 25 nəfərlik siyahıya "Qarabağ"ın bombardiri Dino Ndlovunun adı daxil edilməyib.
İyunun 10-da keçiriləcək görüşə Ndlovunun hansı səbəbdən dəvət almadığı bilinmir. 27 yaşlı forvard əvvəlki baş məşqçi Efraim Maşaba ilə münaqişədə idi. O, mayın 5-də "Qarabağ"ın Naxçıvanda "Qəbələ" ilə keçirdiyi Azərbaycan Kubokunun final matçını zədə üzündən buraxmışdı. Lakin Ndlovunun zədəsi elə də ciddi deyildi.
Baksterin uzun müddət sonra yığmaya qaytardığı 3 oyunçu arasında "Qarabağ"ın maraq dairəsində olan Tokelo Ranti də var. 27 yaşlı hücumçu hazırda Türkiyənin "Gənclərbirliyi" klubunda çıxış edir.
