"Qarabağ” bu gündən 2017/2018 mövsümünün hazırlıqlarına start verib. Sportnet.az-ın klubun rəsmi saytına istinadən məlumatına görə, mövsümün ilk məşqi günorta saatlarında bazada start götürüb.
Hazırlıq prosesində Dino Ndlovu, Arif Daşdəmirov, Elvin Yunuszadə və əvəzedici heyətin bir neçə futbolçusu iştirak edib. Azərbaycan millisinin heyətində olan 8 futbolçu - Rəşad Sadıqov, Bədavi Hüseynov, Maksim Medvedev, Ağabala Ramazanov, Əfran İsmayılov, Qara Qarayev, Rahid Əmirquliyev və Riçard Almeyda, Bosniya və Hersoqovina yığmasına dəvət alan İbrahim Şehiç və U-21 yığmamızın toplanışına dəvət alan Mahir Mədətov, Elgün Uluxanov və Eltun Turabov ilk məşqdə iştirak etməyib. Daha bir futbolçu Ansi Aqolli isə bir neçə gün sonra komandaya qoşulacaq.
Qeyd edək ki, baş məşqçi Qurban Qurbanov mayın 5-də keçirilmiş ölkə kubokunun final matçından sonra futbolçulara istirahət vermişdi.
