"Bütün məsələləri ilk yarıda həll etməli idik. "Qarabağ" qol vurduqdan sonra bizə bir qədər çətin oldu. Bununla belə, rəqibin təzyiqinə dözə bildik və hamımız birgə vacib nəticəyə nail olduq".
Sportnet.az-ın məlumatına görə, bunu İtaliyanın "Roma" klubunun futbolçusu Edin Ceko Bakıda "Qarabağ"ı 2:1 hesabı ilə yendikləri Çempionlar Liqasının qrup mərhələsinin II tur matçından sonra deyib. Bosniya və herseqovinalı hücumçu əsas məsələnin qələbə olduğunu bildirib: "Yalnız bu fakt əhəmiyyətlidir ki, 3 xal qazandıq. Qalib gəlmək asan deyildi, amma sonda evimizə qələbə ilə qayıdırıq. Hər şey qaydasındadır".
Qeyd edək ki, Edin Ceko 15-ci dəqiqədə "Roma"nın ikinci qolunu vurub.
