"Qələbə qazanmaq üçün istəkli idik. Avropa Liqasına vəsiqə qazanmaq üçün ən yaxın yol kubokdur. Futbolçularla danışmışıq, kubokda bacardıqca irəli getmək istəyirik.
Sportnet.az-ın məlumatına görə, bunu "Kəpəz"in baş məşqçisi Yunis Hüseynov "Binə"ni 3:0 hesabı ilə yendikləri Azərbaycan Kubokunun 1/8 final matçından sonra deyib. 52 yaşlı mütəxəssis kubok şanslarını dəyərləndirmək fikrində olduqlarını vurğulayıb: "Desək ki, çempionat oyunlarında hamını məğlub edib 2-ci və ya 3-cü yeri tutacağıq, bu, yalan olar. Amma kubokda şanslarımızı dəyərləndirmək fikrindəyik. Finala kimi getmək arzusundayıq. Təbii ki, bunun necə olacağını zaman göstərəcək".
Hüseynov "Binə” ilə oyunun ilk hissəsindən narazılıq ifadə edib: "Fasiləyədək komandamız zəif çıxış etdi. Səhvlərimiz çoxdur, bunun üzərində işləməli və əziyyət çəkməliyik. Rəqibdən xoşum gəldi, yaxşı komanda qurublar. Onlara uğurlar arzu edirəm”.
Qeyd edək ki, "Kəpəz" 1/4 finalda "Keşlə" ilə üz-üzə gələcək.
