"Neftçi" komandasının 2 oyunçusu I Divizionda mübarizə aparan "Sabah" klubunun maraq dairəsinə düşüb. Bu barədə Sportnet.az-a "Sabah"ın baş məşqçisi Arif Əsədov məlumat verib.
47 yaşlı mütəxəssis bildirib ki, bunlar qapıçı Maksim Vaylo ilə müdafiəçi Rahil Məmmədovdur. O, artıq "Neftçi"yə rəsmi formada müraciət etdiklərini də əlavə edib. Əsədov Vaylo ilə Məmmədovu icarəyə götürmək istədiklərini söyləyib. Təcrübəli baş məşqçi hələlik qarşı tərəfdən cavab almadıqlarını diqqətə çatdırıb.
Əsədov qışda heyətə ümumilikdə 8 yeni oyunçu cəlb etmək istədiklərini vurğulayıb.
Qeyd edək ki, "Sabah" I Divizionda ilk dövrəni 15 xalla 10 komanda arasında 9-cu yerdə başa vurub.
