Futzal üzrə Azərbaycan milli komandası Avropa çempionatının final mərhələsində ilk oyununu fevralın 2-də Fransaya qarşı keçirəcək. Sportnet.az-ın məlumatına görə, millimizin rəqibləri Fransa və İspaniya milliləri isə yanvarın 31-də üz-üzə gəliblər.
4:4 hesablı heç-heçə ilə yekunlaşmış görüşü millimizin üzvləri də izləyiblər. Qarşılaşmanın ardından onlar Azərbaycan Futzal Federasiyasının mətbuat xidmətinə görüşlə bağlı fikirlərini bildiriblər.
Vitali Borisov: "Oyunu canlı izlədik. Fransa yaxşı təşkilatlanmış komandadır. Oyun ərzində hesabda geri düşmədilər, üstünlüklərini sona yaxın əldən verdilər. Fərdi qabiliyyətlərinə görə seçilirlər, fiziki baxımdan isə çox güclüdürlər. Bizi çətin oyun gözləyir. Ümumiyyətlə, Avropa çempionatının final mərhələsində asan oyun olmur. Meydana çıxanda heç nəyə düşünməməli, sona qədər mübarizə aparmalı, qələbə qazanmalıyıq. Təbii ki, diqqət etməli olduğumuz məqamlar var. Xüsusilə də rəqibin atletik cəhətdən seçildiyini, əksər oyunçularının boy-buxunlu olduqlarını unutmamalıyıq. Oyunu 6-7 nəfərlə keçirdilər, buna baxmayaraq, İspaniya kimi rəqibin təzyiqinə dözdülər. Çox soyuqqanlıdırlar, öz oyunlarını nümayiş etdirirlər. Bu sadaladıqlarıma baxmayaraq, özümüzə inanmalı, oyunumuz göstərməliyik. İspaniyanın da zəif çıxış etdiyini deməzdim. Onlar ənənəvi oyunlarını göstərməyə çalışırlar, qol epizodları da yaratdılar. Sadəcə, fransızlar onların tam rahat hərəkət etməsinə, istədiklərini reallaşdırmasına imkan vermirlər”.
Rizvan Fərzəliyev: "Fransa əsasən birə-bir oynamağa çalışdı. Oyun üslubları fərqlidi. Onlar fərdi deyil, hansısa epizod zamanı zonalı oyun tərzinə üstünlük verirlər. Amma bu o demək deyil ki, fərdi qabiliyyətlərindən rəqibini keçmək üçün istifadə etmirlər. Əksinə, fürsət yaxaladıqca, rəqibi tərkisilah etməyə çalışırlar. Həm də özlərindən o qədər əmindirlər ki, həmin sonaya kimsə sığortalamaq üçün gəlmir. Qol vurduqları epizodlara gəldikdə, birinci qol zamanı bizim taktikaya yaxın hərəkət etdilər, pressinq tətbiq edib topu qazandılar və hesabı açdılar. Daha sonra birə-bir rəqibini keçib fərqləndilər. Buraxdıqları qollara gəldikdə, biz də bu cür vəziyyətlərdən yararlana bilərik. Artıq bu işdə "stolba”mızın üzərinə çox iş düşür. Çünki dərhal topu ona ötürməliyik. Həmin anda bir balaca fərdi üstünlük qazansa yaxınlığındakı komanda yoldaşına ötürmə edə və qol epizodu yarada bilərik. Ümumi götürdükdə, Fransa pis təsir bağışlamadı, sona qədər mübarizə apardılar. Əsas diqqət edəcəyimiz məqamlardan biri rəqibin müdafiədə yol verəcəyi səhvləri vaxtında dəyərləndirməklə bağlıdı. Artıq bunu taktiki tapşırıqlar əsasında edəcəyik”.
Emin Kürdov: "İki gündü Avropa çempionatının oyunlarını canlı izləyirik. Artıq görünən odur ki, hər kəs futzal oynamağı bacarır. Heç kim final mərhələsinə turist kimi gəlməyib. Fransa oyunu əsasən müdafidədən qurdu, rəqibin səhv etməsini gözlədi ki, bundan maksimum yararlandı. İspaniya ilə matçda bunun şahidi olduq. Kifayət qədər güclü rəqibdirlər. Avropa çempionatına iddialı gəliblər. Yaxşı hazırlıq keçiblər ki, İspaniya kimi güclü rəqibdən çəkinmədilər, əksinə, debüt ilində ilk matçını xalla qapadılar. Yəni layiqli mübarizə aparırlar.
Qapıçı olduğuma görə, hücumçularının uzaq məsafədən təhlükəli zərbələr endirdiyini qeyd edə bilərəm. Kifayət qədər güclü hücumçuları var və "çərçivə”ni dəqiq görürlər. Abdessamad Mohammed, Landri Nqala təhlükəli hücumçulardır. Bizim üçün çətin qarşılaşma olacaq”.
Everton Kordoso "Qalo”: "Fransa çox hazırlıqlı komandadır. Güclü rəqibə qarşı əla oyun göstərdilər. Son saniyəyə qədər mübarizədən qopmadılar. Oyun nizam-intizamına tam riayət etdilər. Bir sözlə, debütant olsalar da, çempionata güclü hazırlaşıblar. Bizi sabah çox çətin oyun gözləyir”.
