"Sumqayıt" klubunun futbolçusu Amil Yunanovun Sportnet.az-a müsahibəsi
- Premyer Liqanın ötən turunda səfərdə "Keşlə"ni məğlub etdiniz. Növbəti turda isə "Qarabağ"la qarşılaşacaqsınız. Liderlə matçdan nə gözləyirsiniz?
- "Keşlə"ni çətinliklə məğlub etdik. Bizim üçün ağır səfər oyunu oldu. Səfərdən 3 xalla qayıtdıq. Artıq "Qarabağ"la oyunu fikirləşirik. Məşqlərə də başlamışıq. Bütün qüvvəmizlə oyuna hazırlaşırıq. Çalışacağıq ki, doğma meydandakı oyunda sərfəli nəticə əldə edək.
- "Qarabağ"ı kubokdan kənarlaşdırdınız. Həmin matçda da fərqlənmişdin. Düşünmürsünüz ki, rəqib bu oyuna revanş üçün çıxacaq?
- Mən belə düşünmürəm. "Qarabağ" bizimlə matça adi çempionat oyunu kimi baxacaq. Biz də digər oyunlara necə baxırıqsa, bu matça da elə çıxacağıq. Əsas məqsədimiz xal qazanmaq olacaq. Komandanı yuxarı pillələrə qaldırmaq istəyirik.
- "Qarabağ"a qarşı matçda xal qazanacağınız real görünür?
- Futbolda hər şey ola bilər. Hər şey komandamızın oyunundan asılıdır. Bu oyunda yaxşı oynamaq və yaxşı nəticə əldə etmək istəyirik.
- Rəqib komandanın futbolçusu Mahir Mədətovu bombardirlik yarışında keçmək hədəfin varmı?
- Qol vurmağım komandadan asılı məsələdir. Mənim üçün əsas komandamın qələbəsidir. Qolları isə ona görə vururam ki, komandam qalib gəlsin.
- Bu oyunda özünü milli komandanın baş məşqçisi Qurban Qurbanova göstərməyi hədəfləyirsənmi?
- Hər bir oyunçu kimi mən də özümü yaxşı tərəfdən göstərmək istərdim. Bunun üçün ilk növbədə, öz klubumun uğuru üçün çalışmalıyam. Bunu bacarsam, milli komandaya da dəvət alacağam.
- "Sumqayıt" 4-cü yerdə qərarlaşsa da, 3-cü yerdə gedən "Zirə" ilə xal fərqi 5-ə enib. Bu yer üçün iddianız varmı?
- Biz ancaq qarşıdakı oyunlarda yaxşı nəticələr əldə edib xal ehtiyatımızı artırmaq istəyirik. Bacardığımız qədər irəli getməyi planlaşdırırıq. Bizim komanda yaxşı oynayır. "Sumqayıt" yerli futbolçularla yüksək pillələr uğrunda mübarizə aparır. Bu isə çox sevindirici haldır. Futbolçuların hamısı azərbaycanlıdır. Çalışırıq ki, bu komanda ilə birgə daha yaxşı nəticələr əldə edək.
- Mövsümün sonunda "Sumqayıt"la müqavilən başa çatır. Hazırda "Neftçi"də çalışan klubunuzun sabiq meneceri Ceyhun Sultanov heyətinizdən bir neçə futbolçunu transfer etmək istədiklərini bildirib...
- Mən bu barədə heç nə fikirləşmirəm. Qarşıda çempionat oyunlarımız var. Azərbaycan Kubokunda da mübarizəni davam etdiririk. Hazırda bütün fikrimi oyunlara yönəltmişəm. Müqaviləm mövsümün sonunda bitir. Bu barədə isə çempionat və kubok oyunları başa çatdıqdan sonra fikirləşmək lazımdır.
- "Sumqayıt" uğurlu qrafik yaxalayıb. Bunun hər hansı bir səbəbi varmı?
- "Sumqayıt"da birlik və mehribançılıq var. Bunlar olan yerdə isə hər şey yaxşı olur. Baş məşqçimizin tapşırıqlarını yerinə yetiririk. Hər şey baş məşqçidən başlayır. Məşqlərimiz yüksək səviyyədə keçir. Bu da oyunlarda öz əksini tapır. Demək olar ki, bizim komandada hər şey yaxşıdır.
Təbriz QULİYEV
