"Məşqlərə bu gün başlamışıq. İlkin heyətimiz də məlumdur. Düzdü, yekunda bizə 10 oyunçu və 2 qapıçı lazımdır. Amma heyətə 18 futzalçı dəvət etmişik. İndiki məqamda toplanış həm də seleksiya xarakteri daşıyır. Vaxtımız çox azdır. Bir qədər əvvəldən toplanışa başlamaq istərdik, amma bayramlar buna imkan vermədi. Çalışacağıq ki, qarşıdakı günlərdən maksimum istifadə edək”.
Sportnet.az-ın məlumatına görə, bunu futzal üzrə Azərbaycan millisinin baş məşqçisi Joze Alesio Da Silva Bakıda keçiriləcək Türk Universiadasına hazırlıq barədə danışarkən deyib. Braziliyalı mütəxəssis rəqibləri və şansları dəyərləndirib: "Türkiyə və Qırğızıstanı deyə bilmərəm, amma Qazaxıstanı yaxşı tanıyırsınız və potensialına bələdsiniz. Çox çətin olacaq. Türkiyə və Qırğızıstan haqda məlumat toplayacağıq. Ancaq Qazaxıstanla matçın çox çətin keçəcəyi danılmazdı. Çünki onlar gənc futzalçılarınn yetişdirilməsi işinə çoxdan başlayıblar. 17-18 yaşlı oyunçular artıq "Kayrat”, "Ayat”, "Aktobe”, "Jetısu” kimi komandaların üzvləridir. Yəni qazaxlar işə əvvəldən başlayıblar və əllərinin altında müəyyən qədər hazır gənc futzalçılar var. Qazaxıstanda 2-3 ildi gənclər komandaları yaradılıb. Bura 17-21 yaşlı futzalçılar cəlb edilib. Bu da məşqçi üçün geniş seçim imkanı yaradır”.
"Açıqladığınız heyətdə yer alan futzalçıların əksəriyyəti Yüksək Liqada çıxış edən oyunçulardı. Belədə şikayət etməyə bu qədər əsas varmı?" sualını isə Da Silva belə cavablandırıb: "Komanda ilə bağlı müəyyən planlarım, düşüncəm var. Bu yarışa ciddi hazırlaşacağıq. Çünki komandanın məqsədi maksimum nəticə əldə etməkdir. Yenə deyirəm, çətin olacaq, ancaq mümkünsüz iş yoxdu. Məşqlərdə müəyyən tapşırıqlar üzərində işləyəcəyik. Düzdü, hazırlıq keçdiyimiz müddətdə çempionat oyunları da keçiriləcək.. Ancaq bunun işimizə mane olmayacağına inanıram”.
Baş məşqçi Birinci Liqada çıxış edən 17 yaşadək futzalçılardan ibarət Azərbaycan millisini nəzarətdə saxladığını qeyd etməklə yanaşı, bu yarışa həmin komandadan oyunçu dəvət etməməsinin səbəbini də açıqlayıb: "O komandada perspektivli uşaqlar var. Ancaq onların əksəriyyəti əvvəllər futbol oynayıblar. İndi-indi futzal oynamaq istəyirlər. Futbolla futzal isə fərqli idman oyunudu. Meydançadan tutmuş topa, oyun fəlsəfəsinə qədər bir-birindən fərqlənir. Ona görə də gənclər üzərlərində çox işləməlidirlər. Bu komandanın oyunlarını mümkün qədər izləyirəm, ehtiyac duyulduqda məsləhətlər verirəm. Hər dəfə də deyirəm ki, çalışın özünüzü inkişaf etdirəsiniz. Bunun üçün də çoxlu məşqlər etmək, məşqçilərin dediklərini qavramaq və onu tətbiq etməyə çalışmaq vacibdir”.
