"Neftçi" və "Qəbələ" komandaları son 11 gündə 3-cü dəfə üz-üzə gələcəklər.
Sportnet.az-ın məlumatına görə, Azərbaycan kubokunun yarımfinalında üz-üzə gələn rəqiblər aprelin 12-də Qəbələ şəhər stadionunda, 18-də "Bakcell Arena”da qarşılaşıb. Evdə 1:2 hesabı ilə uduzub, səfərdə 3:1 hesablı qələbə qazanmaqla finala yüksələn "qırmızı-qaralar” bundan 4 gün sonra yenidən özü üçün uğurlu olan stadiona çıxacaq.
Aprelin 22-də "Bakcell Arena"da "Neftçi" və "Qəbələ" arasında Topaz Premyer Liqasının XXIV tur qarşılaşması keçiriləcək. Mövsümdə 6-cı dəfə görüşəcək komandalar tarixdə 45-ci dueldə üz-üzə gələcək.
İlk dəfə 2006/2007 mövsümündə qarşılaşan rəqiblər indiyədək 44 dəfə münasibətlərini ayırd edib. Əvvəlki oyunlarda 16 qələbəsi olan "Qəbələ” səfər matçına tarazlığı bərpa etməyə çıxacaq. "Neftçi” daha çox – 17 dəfə qalib gəlib. Digər 11 qarşılaşma heç-heçə başa çatıb. "Qırmızı-qaralar” top fərqində üstünlüyə malikdir. 58 qol vuran komandamız 56 top buraxıb.
Baş tutan 44 oyunda "Qəbələ”nin ən məhsuldar futbolçusu Baqali Dabodur. O, paytaxt təmsilçisi ilə görüşlərdə 6 qol vurub. Dodo 4, Aleksey Qay, Lorentso Ebesilio, Yannik Kamanan, Ruslan Qurbanov və Stiven Monroz hərəyə 3 dəfə rəqibi məyus edib.
5 dəfə ölkə kubokunda qarşılaşan "Qəbələ” və "Neftçi” Premyer Liqada 39 dəfə üz-üzə gəlib. Sabah keçiriləcək görüş çempionatda 40-cı duel olacaq. Əvvəlki 39 matçda bakılılar 16, qəbələlilər 15 dəfə qalib gəlibsə, 8 matçda sülhlə barışıblar. Premyer Liqada "qırmızı-qaralar” 51, "ağ-qaralar” 50 qol vurub.
Ümumilikdə "Qəbələ” səfərdə 9 qələbə qazanıb, 7 dəfə məğlub olub. Digər 5 görüş heç-heçə nəticələnib. Rəqib meydanında 30 top vuran komandamız 27-ni buraxıb.
