Topaz Premyer Liqasının XXV turunda evdə "Səbail"ə 1:2 hesabı ilə uduzan "Sumqayıt"ın futbolçusu Vurğun Hüseynov oyundan sonra jurnalistlərin suallarını cavablandırıb.
Sportnet.az-ın məlumatına görə, müdafiəçi öncə zədəsi ilə bağlı danışıb.
- Baş məşqçi şans versəydi oynayardım. Tam hazır deyiləm. 3 həftə ərzində məşqlərdə iştirak etmirdim. 3 gündür ki, komanda ilə birgə məşq edirəm. Zədəmi tam bərpa etməmişəm. Amma bu günkü görüşdə ehtiyac olsaydı, oynaya bilərdim.
- Samir Abasov "Kəpəz"lə oyunda səni start heyətdə meydana buraxacağını dedi. Bu barədə sizə nəsə deyib?
Bizim heyət çox yaxşıdır. Hamı əsas heyətdə oynaya bilər. Şans veriləcəyi təqdirdə mən də əlimdən gələni edəcəm. Komandama kömək etmək istəyirəm.
- Ardıcıl iki oyundur ki, məğlub olursunuz. 3-cü pillədə qərarlaşsanız da rəqibləriniz də sizə yaxınlaşır...
- Bu gün də qələbə qazanmaq istəyirdik. Çoxlu qol epizodları yaratdıq. Sadəcə olaraq şans bizim tərəfdə deyildi. Qarşıda 3 oyun var. İkisi evdə biri isə səfərdə olacaq. Düşünürəm ki, yaxşı nəticələr qazana biləcəyik.
- Siz olmadığınız vaxtda komandanın müdafiəsini necə dəyərləndirirsiniz?
Bütün müdafiəçilər eyni səviyyədədir. Digərləri də çox yaxşı çıxış edirlər. Komandaya geri dönəndən sonra çalışacam ki, arxa xətdə daha da yaxşı təsir bağışlayaq.
- Son uğursuz nəticələri nə ilə əlaqələndirirsiniz?
- Kuboku da uduzduq. "Qarabağ"la və bu günkü matçda da futbolçularımız yaxşı oynadı. Şans bizdən üz döndərib. Alınmadı. Amma yaxşı nəticələr olacaq. Yaxşı oynayırıq. Amma şanslardan yararlana bilmirik. Bunun üzərində çalışacağıq.
- Mövsümün sonunda müqaviləniz başa çatırmı?
- Bəli. Amma bu an elə vəziyyətdəyik ki, o barədə düşünmürük. Əsas komandaya kömək etməli və nəticə qazanmalıyıq. Əsas Sumqayıt şəhəri üçün tarix yazmaq istəyirik. Onu əldə edək, sonra müqavilə haqqında fikirləşmək olar.
- Yaxşı nəticələrdən sonra "Sumqayıt"ın futbolçularının qiyməti artıb. Sizə təklif göndərilib?
- Təkllif gəlməyi normal haldır. Komanda yaxşı oyun sərgiləyir. Samir Abasovun da rolu çoxdur. Sözün düzü, mənə təklif yoxdur. Mənə Təklif gəlsə, fikirləşmərəm. Çünki o barədə fikirləşməyə dəyməz. Biz bu an komandaya xeyir verməliyik.
