"Qəbələ"nin 17 yaşadək futbolçulardan ibarət komandası mayın 27-də Xorvatiyada start götürəcək beynəlxalq "Kvarnerska Riviyera" turnirinə qatılacaq.
Bu barədə Sportnet.az-a klub akademiyasının direktor müavini Nail Kərimov məlumat verib.
Onun sözlərinə görə, bir həftə davam edəcək sayca 66-cı yarışda "Qəbələ" "Domjale" (Sloveniya), "Osiyek" (Xorvatiya) və OSK klubları ilə eyni qrupda yer alacaq. Turnirə İtaliyanın "Udineze" və "Sampdoriya", Xorvatiyanın "Dinamo" (Zaqreb) kimi komandaları da qatılacaq.
N.Kərimov maliyyə və digər məsələlərlə əlaqədar bu həftə Fransada keçirilməli olan beynəlxalq Reze turnirindən imtina etdiklərini də əlavə edib: "Bir neçə variantımız var idi. Daha sərfəli olanını seçdik. Reze turnirində ailələr uşaqları qebul edirlər. Təşkilatçılar da heyətə yasayiş ve qidalanma verir. Bu il bizə teklif olunanda artıq xarici komandaların sayı çox idi. Yerlər dolmuşdu. Ona görə də qəbul etmədik. Çünki viza, bilet xərcləri var. Həm də Parisə düşəndən sonra qatarla Reze yaxınlığındakı Nanta getmək və qayıtmaq lazımdır".
