AFFA İntizam Komitəsinin bugünkü iclasında 2018-2019 mövsümünün son oyunu olan Azərbaycan Kubokunun final matçında baş verənlərə baxılıb.
Sportnet.az Peşəkar Futbol Liqasının rəsmi saytına istinadən verdiyi məlumata görə, mayın 28-də üz-üzə gəlmiş "Keşlə" və "Qəbələ" klubları cəzalara məruz qalıb. Paytaxt təmsilçisi 5 futbolçusunun sarı vərəqə alması üzündən 800 manat cərimələnib.
88-ci dəqiqədə "Qəbələ”nin futbolçusu İlqar Qurbanov aqressiv davranışa görə birbaşa qırmızı vərəqə alaraq meydandan kənarlaşdırıldığı üçün 2 oyun cəzalanıb, klubu 1600 manat cərimə olunub. Kluba daha 800 manat cərimə azarkeşlərinin 55-ci dəqiqədə pirotexniki vasitələrdən yararlanmaları, 1600 manat cərimə isə 90+3-cü dəqiqədə isə meydana kənar əşyalar atmaları səbəbindən kəsilib.
Qeyd edək ki, oyun "Keşlə"nin 1:0 hesablı qələbəsi ilə yekunlaşıb.
