İspaniyanın "Barselona” klubunun futbolçusu Arturo Vidal gecə klubunda dalaşdığı üçün 800 min avro cərimələnib.
Sportnet.az-ın TZ nəşrinə istinadən məlumatına görə, 31 yaşlı yarımmüdafiəçi 2017-ci ildə Almaniya "Bavariya”sında çıxış edərkən Münhendə gecə klublarının birində dava-dalaşda iştirak edib. Həmin vaxt zərərçəkmiş başına vurulan butulka nəticəsində travma alıb. Bu gün həmin işlə əlaqədar məhkəmə olub. Çili yığması ilə Meksikada olduğu üçün Vidal məhkəmədə iştirak edə bilməyib. Məhkəmə futbolçu haqqında qiyabi hökm çıxarıb. Qərara əsasən, Vidal 80 gün ərzində 800 min avro cərimə ödəməlidir.
Məhkəmənin qərarına əsasən, həmin dava-dalaşda iştirak etmiş futbolçunun qardaşı Sandrino da cəzalanıb. O, 120 gün ərzində 18 min avro ödəməlidir.
