Bu həftə Topaz Premyer Liqasının XVII turunun qarşılaşmaları baş tutacaq.
Sportnet.az xəbər verir ki, “Zirə” mövsümün ikinci yarısında öz meydanında 2-ci dəfə azarkeşləri önünə çıxacaq. “Qartallar” çempionatın lideri “Neftçi” ilə üz-üzə gələcək. Bu, komandaların Premyer Liqa çərçivəsində 15-ci dueli olacaq.
“Zirə” indiyədək 14 dəfə “Neftçi” ilə qarşılaşıb. Bu oyunlarda “Qartallar”ın böyük üstünlüyü var. 8 dəfə qalib gələn qəsəbə təmsilçisi 4 heç-heçə edib və yalnız 2 matçda uduzub.
Texniki nəticəni nəzərə almasaq, rəqib qapısından 18 top keçirən "Zirə" 11 qol buraxıb. “Zirə”nin qollarına 12 oyunçu imza atıb. Bir dəfə isə rəqib avtoqol müəllifi olub. “Qartallar”ın heyətində Luis Alberto Diez daha çox – 3 qol vurub. Nelson Bonilla, Riçard Qadze və Vüsal İsgəndərli hərəyə 2 dəfə fərqlənib.
“Zirə” 8-ci dəfə “Neftçi” ilə oyuna ev sahibliyi edəcək. Qəsəbə təmsilçisinin meydanındakı qarşılaşmalarda heç-heçə qeydə alınmayıb. 5 qələbəsi olan “Qartallar” 2 dəfə meydandan xalsız ayrılıb. Bu matçlarda 9 qol vuran futbolçularımız 5 top buraxıblar.
