Futbol üzrə Çempionlar Liqasında 1/8 final mərhələsinin son 2 cavab görüşü keçirilib.
Sportnet.az-ın məlumatına görə, İspaniyada "Barselona" Fransa "Lion"unu qəbul edib. Görüş meydan sahiblərinin böyük hesablı qələbəsi ilə yekunlaşıb - 5:1. Hesabı 18-ci dəqiqədə Lionel Messi açıb. O, penaltini dəqiq yerinə yetirib. 31-ci dəqiqədə isə Filippe Koutinyo ikinci qolu vurub. 58-ci dəqiqədə Lüka Tuzar fərqi azaltsa da, oyunun sonlarına doğru meydan sahibləri daha 3 qol vurublar. 78-ci dəqiqədə Messi "dubl" edib. 81-ci dəqiqədə Jerar Pike, 86-cı dəqiqədə isə Usman Dembele fərqlənərək, oyunun yekun nəticəsini müəyyənləşdiriblər.
İlk görüş qolsuz yekunlaşdığı üçün Kataloniya komandası mərhələ adlayıb. "Barsa" həm də 1/8 final səddini keçən yeganə İspaniya təmsilçisi olub. PSJ-dən sonra "Lion"un da mübarizəni dayandırmasından sonra Fransa 1/4 finalda təmsilçisiz qalıb.
Almaniya da 1/8 finalda hər iki komandasını itirib. "Mançester Siti" önündə boyun əyən "Şalke"nin ardından "Bavariya" da İngiltərənin daha bir təmsilçisi "Liverpul"la bacarmayıb. İlk görüşdə səfərdə qolsuz heç-heçə etmiş Münhen komandası ev oyununda uduzub - 1:3.
Fasiləyədək tərəflər hərəyə bir dəfə fərqləniblər. Qonaqlardan Sadio Mane 26-cı dəqiqədə hesabı açıb. 39-cu dəqiqədə isə onun komanda yoldaşı Joel Matip topu öz qapısına göndərib. İkinci hissədə "Liverpul" daha 2 qol vurub. 69-cu dəqiqədə Vircil van Deyk qonaqları önə çıxarıb. Son nöqtəni isə 84-cü dəqiqədə Mane qoyub.
Beləliklə, 1/4 finala vəsiqə qazanan komandaların yarısı İngiltərə təmsilçiləri olub. Daha əvvəl bu ölkədən "Mançester Siti", "Mançester Yunayted" və "Tottenhem" də 1/8 final səddini keçib. Digər vəsiqələrə İtaliyanın "Yuventus", Hollandiyanın "Ayaks" və Portuqaliyanın "Portu" komandaları yiyələnib.
1/4 final, yarımfinal və final mərhələlərinin püşkatma mərasimi martın 15-də UEFA-nın İsveçrənin Nyon şəhərindəki mənzil-qərargahında keçiriləcək. Oyunlar isə 9-10 aprel və 16-17 apreldə olacaq.
------------------------
Bu gün UEFA Çempionlar Liqasında 1/4 final mərhələsinə vəsiqə qazanacaq son iki komanda müəyyənləşəcək.
Sportnet.az xəbər verir ki, bu, İspaniya və Almaniyada baş tutacaq 1/8 final mərhələsinin cavab oyunlarından sonra bəlli olacaq. İlk görüşlər qolsuz yekunlaşdığından, cavab qarşılaşmalarının nəticələri daha böyük əhəmiyyət kəsb edir.
"Barselona" Fransa "Lion"unu, "Bavariya" isə İngiltərə "Liverpul"unu qəbul edəcək. Hər iki cütün ilk görüşündə heç-heçə qeydə alındığından növbəti qarşılaşmalar gərgin mübarizə vəd edir. Hərçənd, “Barselona”nı “Lion”la ev oyununda aşkar favorit saymaq olar.
Kataloniya təmsilçisi La Liqada 63 xalla lider olduğu halda, "şirlər" Liqa 1-də 50 xalla 3-cü yerdədir və 1-ci pillədəki PSJ-dən 21 xal geri qalır.
“Barselona”da Usman Dembele və Tomas Vermaleninin oynayıb-oynamayacağı dəqiq bilinmir. “Lion”da Amin Quiri zədəli, Marselo Filyonun durumu sual altındadır.
Digər cütlüyə gəldikdə, “Bavariya” Bundesliqada 57 xalla Dortmund “Borussiya”sı ilə zirvəni bölüşür. “Liverpul” isə Premyer Liqada 73 xalla 2-ci yerdədir və lider “Mançester Siti”dən 1 xal geri qalır.
Münhen komandasının heyətində Tomas Müller ilə Yozua Kimmix cəzalı, Korenten Tolisso və Aryen Robben zədəlidir. Kinqsli Komanın vəziyyətinə isə oyun saatında aydınlıq gələcək. “Liverpul”da 2 itki var. Aleks Oksleyd-Çemberlen və Co Qomes zədə üzündən meydana çıxa bilməyəcəklər.
Çempionlar Liqası
1/8 final, cavab oyunları
13 mart
24:00. “Barselona” (İspaniya) – “Lion” (Fransa) - 5:1
Qollar: Lionel Messi, 16 (pen.); 78; Filippe Koutinyo, 31; Jerar Pike, 81. Usman Dembele, 86 - Lüka Tuzar, 58
Baş hakim: Şimon Martsinyak (Polşa)
“Kamp Nou” stadionu
İlk oyun – 0:0
24:00. “Bavariya” (Almaniya) – “Liverpul” (İngiltərə) - 1:3
Qollar: Joel Matip, 39 (öz qapısına) - Sadio Mane, 26; 84. Vircil van Deyk, 69
Baş hakim: Lorentso Manqanelli (İtaliya)
“Münhen Arena”
İlk oyun – 0:0.
