Futbol üzrə Çempionlar Liqasında ilk finalçı İngiltərənin "Liverpul" komandası olub.
Sportnet.az-ın məlumatına görə, Yurgen Kloppun baş məşqçi olduğu kollektiv yarımfinalda İspaniya "Barselona"sını iki oyunun yekununda mübarizədən kənarlaşdırıb. İlk matçda 0:3 hesabı ilə uduzan mersisaydlılar cavab görüşündə daha böyük fərqlə qalib gəliblər - 4:0.
Hesabı 7-ci dəqiqədə Divok Origi açıb. 54-cü dəqiqədə Jorjino Veynaldum ikinci qolu vurub. Bundan 2 dəqiqə sonra Veynaldum, 79-cu dəqiqədə isə Origi "dubl" edib.
Beləliklə, "Liverpul" inanılmazı bacararaq, ardıcıl ikinci mövsüm finala yüksəlib. Həlledici görüşə daha bir vəsiqənin sahibi bu gün Hollandiyada "Ayaks" və İngiltərə "Tottenhem"i ilə matçdan sonra müəyyənləşəcək. Final oyunu iyunun 1-də Madriddəki "Metropolitano" stadionunda keçiriləcək.
---------
Bu gün UEFA Çempionlar Liqasında (ÇL) yarımfinal mərhələsinin ilk cavab görüşü keçiriləcək.
Sportnet.az-ın məlumatına görə, İngiltərədə təşkil olunacaq matçda "Liverpul" İspaniya "Barselona"sını qəbul edəcək. "Mersisaydlılar" səfərdəki 0:3 hesablı məğlubiyyətin əvəzini çıxmağa çalışacaqlar.
Amma "Liverpul" oyuna ciddi itkilərlə çıxacaq. İspaniyadakı qarşılaşmanın 24-cü dəqiqəsində zədələnən Nabi Keyta üçün mövsüm başa çatıb. Brazilyalı hücumçu Roberto Firminonun da eyni səbəbdən bugünkü matçı buraxacağı dəqiqdir. Baş məşqçi Yurgen Klopp həftəsonu İngiltərə Premyer Liqasında "Nyukasl" ilə görüşdə başından zədə alan Məhəmməd Salahın da meydana çıxmayacağını təsdiqləyib. Əzələsində problem olan Adam Lallananın iştirakı isə sual altındadır.
Əvəzində qonaqların heyətində yeganə itki ötən həftəsonu "Selta" ilə İspaniya La Liqası matçında zədələnmiş Usman Dembeledir. Luis Suares və Filippe Koutinyo sabiq komandalarına qarşı ilk dəfə "Enfild"də çıxış edəcəklər.
Cari mövsümdə "Liverpul" ÇL-də doğma meydanda keçirdiyi 5 matçın 4-də qalib gəlib, 1-də isə heç-heçə edib. Katoloniyalılar isə ümumiyyətlə, məğlub olmayıb. "Liverpul" və "Barselona" komandaları "Enfild" stadionunda ümumilikdə 3 dəfə qarşılaşıblar. Bu görüşlərin 2-də katoloniyalılar, 1-də mersisaydılar qələbə qazanıb.
Çempionlar Liqası
Yarımfinal, cavab oyunu
7 may
23:00. "Liverpul" (İngiltərə) - "Barselona" (İspaniya) - 4:0
Qollar: Divok Origi, 7; 79. Jorjino Veynaldum, 54; 56
Baş hakim: Cünyet Çakır (Türkiyə)
Liverpul "Enfild"
