"Gözəl oyun oldu, hər iki komanda yaxşı çıxış etdi. Əgər bu matçı boks döyüşü kimi qiymətləndirsək, biz bir neçə xal çox qazandıq. Hətta qol da vurduq, amma sayılmadı".
Sportnet.az-ın məlumatına görə, bunu "Neftçi"nin futbolçusu Roberto Bordin evdə "Qarabağ"la qolsuz heç-heçə etdikləri Azərbaycan Premyer Liqasının X tur matçından sonra mətbuat konfransında deyib.
İtaliyalı mütəxəssis komandasının oyunundan razılıq ifadə edib: "Həm ilk, həm də ikinci hissədə oyundan razı qaldım. Hər bir futbolçumuzun çıxışını yaxşı qiymətləndirirəm. Tural Axundovun epizoduna baxıb penaltinin olub-olmadığına qiymət verəcəyəm. Konfransdan öncə görüntülərə baxmaq istəsəm də, hələ hazır deyildi. Baxandan sonra da fikir bildirəcəyəm. Boks söhbətini zarafatca dedim. Yəni, biz daha yaxşı oynadıq".
Bordin lider "Qarabağ"la 8 xallıq fərqi aradan qaldırmağa çalışacaqlarını əlavə edib: "Əlbəttə, 8 xal böyük fərqdir. Ancaq qarşıda matçlar var. Bu fərqi aradan qaldırmaq olar. Son 4 görüşdə qələbə qazanmışıq, indi də "Qarabağ"la yaxşı oyunla heç-heçə etdik. Mən çıxışımızdan razı qalmışam. Yəqin ki, rəhbərlik də razıdır".
Təcrübəli mütəxəssisin sözlərinə görə, komandasında heç bir problem yoxdur: "Bu gün məğlub olsaq, deyərdim ki, problem var. "Qarabağ"a qarşı oynadığımızı unutmayaq. Rəqib Avropa Liqasında yarışır, önəmli matçlara çıxır. "Neftçi"də problem olduğunu düşünmürəm. Hər şey öz yolu ilə gedir. Bu gün qol vəziyyətləri yaratdıq, qalib gəlmək istəyirdik".
Baş məşqçi rəqibin futbolçu Riçard Almeyda ilə arasındakı dialoq barədə də danışıb: "Almeydaya başa salmaq istəyirdim ki, ona qarşı kobud oyundan öncə Soni Mustivara qarşı da qayda pozuntusu vardı. Rəqibin məşqçisi ilə də xırda narazılıq oldu. Bu, oyunda olan epizodlardır, orda da qaldı. Oyundan razı qaldım. Çünki futbolçularımız son saniyəyə qədər qol vurmağa köklənmişdilər. Bu gün bir xal qazanmadıq, iki xal itirdik. İki qol epizodumuza təkrar baxacam. Qələbə qazansaydıq, indi burada başqa cür danışırdıq".
