Futbol üzrə Azərbaycan Premyer Liqasında XV turun növbəti oyunu keçirilib.
Sportnet.az-ın məlumatına görə, "Bakcell Arena"da "Neftçi" "Sumqayıt"ı qəbul edib. Gənc referi Kamal Umudlunun idarə etdiyi matç 1:1 hesablı heç-heçə ilə yekunlaşıb. 41-ci dəqiqədə Voislav Stankoviç kobud oyunu ilə əlaqədar meydandan qovulub. Baş hakimin təyin etdiyi cərimə zərbəsini isə Rəhim Sadıxov dəqiq yerinə yetirib.
Flaqman azlıqda olmasına baxmayaraq, bərabərlik qolunu vurmağı bacarıb. 71-ci dəqiqədə Baqali Dabo təkbətəkdən fərqlənib. Bu nəticədən sonra xalını 26-ya çatdıran "Neftçi" 2-ci pillədə qalıb. 19 xala malik "Sumqayıt" isə 5-cidir. Qeyd edək ki, turun açılış matçında "Zirə" "Sabah"ı 2:0 hesabı ilə yenərək, 4-cü pilləyə yüksəlib. Tura fevralın 2-də keçiriləcək "Qəbələ" - "Keşlə" və "Səbail" - "Qarabağ" matçları ilə yekun vurulacaq.
----------------------
Azərbaycan Premyer Liqasında mövsümün ikinci yarısına start verilib.
Sportnet.az-ın məlumatına görə, XV turun açılış matçında "Zirə" "Sabah" komandasını qəbul edib. Zirə İdman Kompleksinin stadionunda keçirilmiş oyunda qapılara 2 qol vurulub. Fasiləyə 1:0 üstün yollanan meydan sahibləri ikinci hissədə daha bir dəfə fərqlənməklə görüşdən 3 xalla ayrılıb. "Zirə"nin qollarına 45+1-ci dəqiqədə yeni transfer Ağabala Ramazanov və 78-ci dəqiqədə Riçard Qadze imza atıb.
Bu, "Sabah"ın Azərbaycan Kubokunun 1/4 final oyunları da nəzərə alınmaqla, ardıcıl 5-ci məğlubiyyəti olub. Jelko Sopiçin baş məşqçi olduğu kollektiv daha əvvəl Premyer Liqada "Qarabağ" (0:1) və "Neftçi"yə (0:2), kubokda isə "Qəbələ"yə hər iki matçda (0:3, 2:3) uduzub.
Qeyd edək ki, bu qələbədən sonra xalını 20-yə çatdıran "Zirə" klubu 20 xalla turnir cədvəlinin 4-cü pilləsinə yüksəlib 13 xala malik "Sabah" isə 6-cı pillədə qərarlaşıb. Bu komandalar arasında ilk iki dövrədəki görüşlərdə qalib müəyyənləşməmişdi - 1:1, 2:2.
-------------------------
Bu gün Azərbaycan Premyer Liqasında 2019/2020 mövsümünün ikinci yarısına start veriləcək.
Sportnet.az-ın məlumatına görə, III dövrənin ilk tur matçları iki günü əhatə edəcək. XV turun birinci oyun günündə iki qarşılaşma keçiriləcək. Açılış matçında "Zirə" "Sabah"ı qəbul edəcək. Meydan sahibləri 14 turdan sonra 17 xalla 5-ci, qonaqlar isə 13 xalla 6-cı yerdə qərarlaşıb. Komandalar arasında birinci və ikinci dövrədəki görüşlərdə qalib müəyyənləşməyib - 1:1, 2:2.
Paytaxt təmsilçiləri Premyer Liqada 6 dəfə üz-üzə gəliblər. Bunların birində "Zirə", üçündə isə "Sabah" qələbə qazanıb. Topların fərqində də qonaqların üstünlüyü var - 9:7.
Günün digər oyununda "Neftçi" "Sumqayıt"la qarşılaşacaq. Paytaxt klubu 25 xalla ikinci, "gənclik şəhəri" təmsilçisi isə 18 xalla dördüncü yerdədir. Flaqman birinci dövrədə rəqibini 2:1, ikinci dövrədə isə 4:2 hesabı ilə üstələyib. Komandalar indiyədək çempionatda 30 dəfə qarşılaşıblar. 16 dəfə "Neftçi", 10 dəfə isə "Sumqayıt" meydanı 3 xalla tərk edib. Topların fərqində də paytaxt təmsilçisinin aşkar üstünlüyü var - 51:37.
Azərbaycan Premyer Liqası, XV tur
1 fevral (şənbə)
15:00. “Zirə” – “Sabah” - 2:0
Qollar: Ağabala Ramazanov, 45+1. Riçard Qadze, 78
Hakimlər: Elçin Məsiyev, Elşad Abdullayev, Qəzənfər Məmmədov, Rəşad Əhmədov
Hakim-inspektor: Ramil Diniyev
AFFA nümayəndəsi: Aslan Şahgəldiyev
Zirə İdman Kompleksinin stadionu
17:30. “Neftçi” –“Sumqayıt” - 1:1
Qollar: Baqali Dabo, 71 - Rəhim Sadıxov, 43
Qırmızı vərəqə: Voislav Stankoviç, 41 ("Neftçi")
Hakimlər: Kamal Umudlu, Mübariz Haşımov, Cavanşir Yusifov, Namiq Bəkirov
Hakim-inspektor: Fariz Yusifov
AFFA nümayəndəsi: Ramiz Mustafayev
“Bakcell Arena”
Qeyd edək ki, XV tura fevralın 2-də keçiriləcək "Səbail" - "Qarabağ" və "Qəbələ" - "Keşlə" oyunları ilə yekun vurulacaq.
