Elşən MƏMMƏDOV
"Neftçi"nin yeni transferi Keysuke Hondanın təqdimat mərasiminin martın 15-də keçiriləcəyi açıqlansa da, forma nömrəsi hələ məlum deyil. Əslində bu da təbiidir. Çünki yaponiyalı ulduz 17 ildir davam edən karyerası ərzində sabit nömrə ilə çıxış etməyib.
O, ilk klubu "Naqoya Qrampus"da 4 il ərzində (2003 - 2007) 39 və 24 nömrəli formaları geyinib. Daha sonra Honda Niderland "Venlo"sundakı 3 ilini (2007 - 2009) 29 və 10 nömrəli formalarla keçirib. Bundan sonra orta sahə oyunçusu Rusiya MOİK-ində (2009 - 2013) 7, İtaliya "Milan"ında (2013 - 2017) 10 nömrəli formanı seçib.
Ardından Honda Meksika "Paçuka"sında (2017 - 2018) 2, Avstraliyanın "Melburn Viktori" komandasında və Braziliya "Botafoqo"sunda 4, Niderland "Vitess"ində isə 33 nömrəli formanı geyinib.
Göründüyü kimi, yaponiyalı ulduzun çıxış etdiyi qitələr kimi, forma nömrələri də dəyişkən olub. O, 4 qitədə - Asiya, Avropa, Şimali Amerika, Cənubi Amerika, Avstraliyada çıxış edib. "Neftçi" Hondanın debüt edəcəyi 8-ci klub olacaq.
Digər tərəfdən, yeni transfer Yaponiya millisinin oyunlarında da eyni formada yer almayıb. O, gündoğar ölkə"nin U-19 və U-20 yığmalarında 14, olimpiya yığmasında 8, əsas millisində isə 57, 20, 19, 18, 17, 16, 13 və 2011-ci ildən 4 nömrəli formaları ilə çıxış edib. Bir sözlə, 8 müxtəlif nömrədə.
Hondanın sabit forma nömrələri klublarda 7 və 10, yığmada isə 4 olub. Lakin bu nömrələr hazırda "Neftçi"də boşda deyil. "7" Namik Ələskərovda, "10" - Saman Nərimancahanda, "4" isə Rener Alves de Souzadadır.
35 yaşı bu il tamamlanacaq ulduz futbolçunun yeni klubunda hansı formanı seçəcəyi maraq doğurur. Görünən odur ki, özü nömrə seçimində çox da prinsipial deyil. Bu səbəbdən, "Neftçi"nin hansı formanı təklif edəcəyi bizim üçün sual altındadır.
Sportnet.az olaraq, təklif edərdik ki, Hondaya 44 nömrəli forma təqdim olunsun. Bu rəqəm həm futbolçunun özü, həm nəinki "Neftçi", həm də bütövlükdə Azərbaycan üçün ciddi önəm daşıyır.
44 rəqəmində rəqəmlərin cəmi "Neftçi"nin çempionluq sayını ehtiva edir;
44 rəqəmində rəqəmlərin cəmi Hondanın geyindiyi formaların nömrə saylarıdır;
44 rəqəmində rəqəmlərin cəmi yaponiyalı futbolçunun çıxış etdiyi 8-ci ölkəni göstərir;
44 rəqəmində 4-lərdən biri yeni transferin indiyədək çıxış etdiyi qitələrin sayıdır;
Nəhayət, bu rəqəm 44 günlük Vətən müharibəsinin uğurlu yekununu dünyaya anlatmaq deməkdir. Özü də dünyaca məşhur futbolçunun timsalında.
Görək, futbolçunun özü hansı forma nömrəsini seçəcək?
