Futbol üzrə Azərbaycan Premyer Liqasında IV tura yekun vurulub. Sportnet.az-ın məlumatına görə, turun son oyununda "Qarabağ" "Sumqayıt"ı qəbul edib.
"Azərsun Arena"da keçirilmiş qarşılaşma Ağdam təmsilçisinin 2:0 hesablı qələbəsi ilə yekunlaşıb. Görüşdə hər iki qolu Filip Ozobiç vurub. Azərbaycan millisinin yarımmüdafiəçisi əvvəlcə 42-ci dəqiqədə penaltidən fərqlənib. 30 yaşlı futbolçu görüşün əsas vaxtına əlavə olunmuş 5-ci dəqiqədə isə son nöqtəni qoyub.
Bu nəticədən sonra xallarının sayını 10-a çatdıran "Qarabağ" "Qəbələ" ilə 1-2-ci yerləri bölüşdürür. "Sumqayıt" isə 6 xalla 5-ci sıradadır.
Qeyd edək ki, IV turun ilk oyun günündə "Qəbələ" evdə "Səbail"i 5:0 hesabı ilə darmadağın edib, "Zirə" "Sabah"la sülh bağlayıb - 1:1. Ötən gün baş tutan matçda isə "Neftçi" "Keşlə"nin qapısından 3 cavabsız top keçirib.
--------------------------------------------
Bu gün futbol üzrə Azərbaycan Premyer Liqasında IV tura yekun vurulacaq.
Sportnet.az-ın məlumatına görə, turun son oyununda "Qarabağ" "Sumqayıt"ı qəbul edəcək. "Azersun Arena"dakı qarşılaşma saat 19:00-da başlayacaq.
Hazırda Ağdam klubu 7 xalla turnir cədvəlinin 2-ci pilləsində qərarlaşıb. Rəqibindən 1 xal az toplayan "gənclik şəhəri" təmsilçisi isə 4-cü sırada yer alıb. Komandalar indiyədək ölkə çempionatında 35 dəfə üz-üzə gəliblər. Bu matçların 25-də meydan sahibləri, 5-də qonaqlar qələbə qazanıblar. 5 qarşılaşma isə heç-heçə yeunlaşıb. Topların nisbəti də "köhlən atlar"ın xeyrinədir - 77:18.
“Sumqayıt” 5 oyundur rəqibinə qalib gələ bilmir. “Qarabağ” isə son 11 ev matçında qələbə qazanıb.
Qeyd edək ki, IV turun ilk oyun günündə "Qəbələ" evdə "Səbail"i 5:0 hesabı ilə darmadağın edib, "Zirə" "Sabah"la sülh bağlayıb - 1:1. Ötən gün baş tutan matçda isə "Neftçi" "Keşlə"nin qapısından 3 cavabsız top keçirib.
Azərbaycan Premyer Liqası
IV tur
20 sentyabr (bazar ertəsi)
19:00. “Qarabağ” – “Sumqayıt” - 2:0
Qollar: Filip Ozobiç, 42; 90+5
Hakimlər: Kamal Umudlu, Müslüm Əliyev, Vüsal Məmmədov, Fərid Hacıyev
Hakim-inspektor: Rövşən Əhmədov
AFFA nümayəndəsi: Elgiz Abbasov.
“Azersun Arena”.
