"Hər iki komanda üçün çox vacib oyundur. İlk matç bərabərliklə nəticələnib. Sabah isə hər ikimiz qalib gəlmək istəyirik. Rəqibin açıqlamalarından da çox iddialı və həvəsli olduqları görünür. Bu, bizi məsuliyyətli olmağa bir daha sövq edir. İki eyni səviyyəli komandalarıq və hər ikimizin qalib gəlmə ehtimalımız var. Amma istənilən halda azarkeşlərin yaxşı oyun görəcəklərinə inanıram. Biz də yaxşı oyunlarımızdan birini sərgiləməyə çalışacağıq".
Sportnet.az xəbər verir ki, bunu "Qarabağ"ın baş məşqçisi Qurban Qurbanov Bolqarıstanda MOİK-ə qarşı keçirəcəkləri UEFA Avropa Liqasının II təsnifat mərhələsinin cavab görüşündən əvvəl mətbuat konfransında deyib.
54 yaşlı mütəxəssis daha sonra jurnalistlərin suallarını cavablandırıb:
- Sabahkı oyunun Bakıdakından fərqi nə olacaq?
- Qalib gəlmək istəyiriksə, mütləq Bakıdakından daha yaxşı oynamalıyıq və buna çalışacağıq. Başqa bir ciddi dəyişiklik deyə bilmərəm. Çünki rəqib daim sistemdə rotasiyalar, oyunun gedişatında dəyişikliklər edə bilir. Ona görə də ən güclü silahımız daha yaxşı oynamaq, öz bacarıqlarımızı daha da yaxşılaşdırmaqdır.
- Avrokuboklarda yaxşı təcrübəniz var. Bu praktikadan necə yararlanmağı düşünürsünüz?
- Bəli, komandamın təcrübəsi var. O cümlədən, mənim də. Eyni sözlər rəqibimizə və həmkarıma da aiddir. Xristo Yanev həm yaxşı futbolçu olub, həm də yaxşı baş məşqçidir. Sadəcə, qarşıdakı oyunla bağlı nədən nə cür istifadə edəcəyimizə dair hər hansı detalı açıqlaya bilmərəm. İstənilən halda, belə oyunlarda daha da soyuqqanlı olmalı və daha da səliqəli oynamağa çalışmalıyıq. Amma qarşımızda çox istəkli rəqibin olduğunu bilirik. Bu, əksinə, bizi sevindirir. İnanıram ki, aqressiv azarkeşlər və yaxşı komanda qarşısında daha soyuqqanlı və cəsarətli olacağımıza inanıram. Buna əminəm. Nəticədən asılı olmayaraq, düşünürəm ki, azarkeşlər çox maraqlı oyunun şahidi olacaqlar.
- Ötən Çempionlar Liqası mövsümündə iki ən məhsuldar hücumçunuz Leandro Andrade və Kamilo Duran komandanızı tərk etdi. MOİK-lə ilk matçın qolsuz başa çatdığını nəzərə alsaq, sabahkı matçda onların yerini necə doldurmağı düşünürsünüz və ümumiyyətlə, hücum xəttinizdən gözləntiləriniz nədir?
- Bəli, çox yaxşı iki oyunçumuzu başqa komandalara göndərdik. Hansı ki, kollektivə tam uyğunlaşmışdılar və oyunumuzu daha da yaxşılaşdırırdılar. Bu, çox vacib idi. Həm də hər ikisi çox inamlı futbolçular idi. Lakin bu gün düşünmürəm ki, onlar komandada olsaydılar, biz nələr edərdik. Əksinə, hər ikisinə uğurlar arzulayıram. Onlar bizim sevimli futbolçularımız olublar. Hazırkı hücumçularımızın hər biri özlərini yaxşı tərəfdən göstərməyə çalışır. Bizim çox işgüzar yeni oyunçularımız var və hər birini güvənərək, inanaraq komandaya dəvət etmişəm. Onlar bir qədər fərqli üslubdadır, hər birinin maraqlı manevrləri var, sonadək mübarizə aparmağı bacaran futbolçulardır. İnanıram ki, sabah gedənlərin yoxluğunu o qədər də hiss etdirməyəcəklər, daha istəkli olaraq, nəticə üçün ən yaxşısını etməyə çalışacaqlar. Baxmayaraq ki, ilk oyunda heç-heçə qeydə alınıb.
- İki mövsüm öncə siz Bolqarıstanda "Lüdoqorets"in qapısından 7 top keçirərək, böyük hesablı qələbə qazanmısınız - 7:2. Sabahkı matçda nəticənin necə olacağını düşünürsünüz?
- Xeyr, biz ümumiyyətlə, o nəticə barədə düşünmürük. Belə hesablar hər dəfə olmur, nadir hallarda olur. Amma MOİK bir az fərqlidir. İki il əvvəl Bolqarıstan klubuna 7 qol vurduğumuzu və bunu yenə rahatlıqla edə biləcəyimizi deyə bilmərik. MOİK-in gücünü Bakıda bir daha gördük. Hazırda futbol elə səviyyəyə gəlib çıxıb ki, istənilən komanda belə nəticə göstərə bilər. Hətta eyni səviyyəli komandalar arasındakı matçlarda da bu cür hesablar qeydə alınır. Amma nəticədən asılı olmayaraq, qələbə üçün düzgün oyun qurmalıyıq və düşüncəmiz belədir ki, bu komandaya qarşı səhv etmək olmaz. Bura böyük hesabı yaddan çıxararaq, sabah lazımi nəticə əldə etmək üçün gəlmişik.
