UEFA FIFA prezidenti Canni İnfantinonun dünya çempionatındakı payların özəl investorlara satılması planı ilə bağlı yayılan məlumatlara münasibət bildirib.
Sportnet.az xəbər verir ki, Avropa futbol qurumu bu təşəbbüsə sərt etiraz edib.
“Bu, futbolun idarəedici qurumlarının heç vaxt keçməməli olduğu sərhədi aşır. UEFA buna son dərəcə ciddi yanaşır. Eyni mövqe bütün milli futbol assosiasiyalarına da aiddir. Bu məsələ liqalar, klublar, futbolçular, azarkeşlər, hökumətlər və oyunun gələcəyinə biganə olmayan bütün maraqlı tərəflərə də aiddir. Futbolun ruhu və idarəçiliyi, xüsusilə maliyyə qazancının kimin əldə etdiyi barədə heç bir şəffaflıq olmadığı halda, alınıb-satılan aktivlər deyil. Heç birimiz futbolun sahibi deyilik.
FIFA-nın bunu satmaq səlahiyyəti yoxdur”, - deyə UEFA-nın açıqlamasında bildirilib.
Qeyd edək ki, daha əvvəl Canni İnfantinonun dünya çempionatındakı payların satışı ilə bağlı plan hazırladığı və bu təşəbbüsün FIFA prezidentinə şəxsən on milyonlarla funt-sterlinq qazanc gətirə biləcəyi barədə məlumat yayılmışdı.
